სომხეთის პრემიერმინისტრი ნიკოლ ფაშინიანი საკამათო ღვთისმსახურებას დაესწრო, რომელიც კვირას ეკლესიიდან განკვეთილმა სასულიერო პირმა — არამ (სტეფან) ასატრიანმა ჩაატარა. კრიტიკოსების შეფასებით, ეს შემთხვევა უპრეცედენტო ესკალაციაა მთავრობის და სომხეთის სამოციქულო ეკლესიას შორის მიმდინარე დაპირისპირებაში.

მსახურება ჰოვჰანნავანკის მონასტერში, არაგაწოტნის პროვინციაში გაიმართა. სომხეთის სამოციქულო ეკლესიის სიწმინდემ — წმინდა ეჩმიაძინმა — აღნიშნული მსახურება "უკანონო და სულიერად დამანგრეველ ინიციატივად" გამოაცხადა. ამავე კვირაში ეჩმიაძინმა ასატრიანს სასულიერო წოდება ჩამოართვა.

მსახურებას მთავრობის მაღალი რანგის წევრები ესწრებოდნენ — თავდაცვის, ეკონომიკისა და ჯანდაცვის მინისტრები, ასევე მმართველი პარტიის "სამოქალაქო შეთანხმების" დეპუტატები და გუბერნატორები. მონასტერი მკაცრად იყო დაცული: პოლიციის მანქანები მთელ ტერიტორიას აკონტროლებდნენ, ხოლო პოლიციის უფროსი პირადად ხელმძღვანელობდა უსაფრთხოების ოპერაციას.

ღვთისმსახურების დროს ერთ-ერთი დამსწრე, რომელმაც ხმამაღლა თქვა, რომ განკვეთილ სასულიერო პირს "არ აქვს უფლება ლიტურგია ჩაატაროს", მალევე გააჩუმეს და ტაძრიდან გაიყვანეს.

მალევე ასატრიანმა საჯაროდ გადაუხადა მადლობა ფაშინიანს,"რადგან ის არ გაჩუმდა".

"როცა ჩვენ გვაჩუმებენ, ისინი ღვთის სიტყვას აჩუმებენ," — განაცხადა განკვეთილმა მღვდელმა ამბიონიდან.

"ბატონო პრემიერმინისტრო, თქვენი აქ ყოფნა გვაგულიანებს, რომ არ გავჩუმდეთ," — მის სიტყვებს დამსწრეების აპლოდისმენტები მოჰყვა.

წმინდა ეჩმიაძინმა ამ ყველაფერს მკაცრი განცხადებით უპასუხა, ღვთისმსახურება "სულის დამანგრეველ ინიციატივად" მოიხსენია და პრემიერმინისტრი ეკლესიის "გახლეჩის მცდელობაში" დაადანაშაულა. არაგაწოტნის ეპარქიის რამდენიმე მღვდელმა განაცხადა, რომ იმავე დილით გამოძიების კომიტეტში გამოიძახეს, თუმცა მათ მისვლაზე უარი თქვეს, რადგან მიიჩნევენ, რომ ხელისუფლება ცდილობდა პროვინცია "ღმერთის მსახურების გარეშე" დაეტოვებინა.

ასატრიანი დაძაბულობის ცენტრში 21 ოქტომბერს აღმოჩნდა — იმ დღეს, როცა ეჩმიაძინმა მას სასულიერო წოდება ჩამოართვა "ეკლესიისა და სამღვდელოების დაკნინებისა" და კანონის განმეორებითი დარღვევების გამო. ასატრიანმა ეს გადაწყვეტილება უარყო და მსახურების ჩატარება განაგრძო, რაც კვირის დასაწყისში ფიზიკურ დაპირისპირებაშიც გადაიზარდა.

კვირა დღის მსახურებამდე ფაშინიანმა ვიდეომიმართვა გამოაქვეყნა, სადაც განაცხადა, რომ მსახურება "ეჩმიაძინის გათავისუფლების პრაქტიკულ დასაწყის" აღნიშნავდა.

"თითოეულმა ჩვენგანმა უნდა გააკეთოს თავისი არჩევანი," — თქვა პრემიერმინისტრმა, მიმართა რა როგორც მორწმუნეებს, ასევე სასულიერო პირებს. — "ყველა მიყვარხართ და ყველასთვის ვლოცულობ."

დღის ბოლოს ფაშინიანმა გამოაცხადა, რომ მომდევნო კვირას იგივე ტაძარში კიდევ ერთი შეკრება გაიმართებოდა.

ეკონომიკის მინისტრმა გევორგ პაპოიანმა პრემიერის დასწრება "განახლების სიმბოლურ აქტად" შეაფასა.

"დღევანდელმა მსახურებამ აჩვენა, რომ ათასებს შეუძლიათ ეკლესიაში დაბრუნება, როცა ის კორუფციისგან თავისუფლდება," — განაცხადა მან.

პარტია "სამოქალაქო შეთანხმების" თავმჯდომარის მოადგილემ, ვაჰაგნ ალექსანიანმა ეკლესიაში პოლიტიკური ჩარევის შესახებ ბრალდებები უარყო:

"განა არ გვაქვს უფლება მივიღოთ ლიტურგიაში მონაწილეობა და ზიარება? ვერ ვხვდები, რატომ ხდება ამაში დაყოფა."

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.