რუსეთს აზერბაიჯანის სარკინიგზო ქსელის გამოყენებით, აზერბაიჯანის გავლით, რუსული პროდუქციის სომხეთში გატანის შესაძლებლობა ექნება, — ამის შესახებ რუსეთის ვიცეპრემიერმა ალექსეი ოვერჩუკმა განაცხადა.

"აზერბაიჯანულმა მხარემ დაადასტურა აზერბაიჯანის რკინიგზის გამოყენების შესაძლებლობა რუსული პროდუქციის აზერბაიჯანის გავლით სომხეთში ტრანზიტისთვის," — თქვა ოვერჩუკმა კვირას. "რუსეთის რკინიგზა ამჟამად რეგიონულ პარტნიორებთან ამ გადაზიდვების ორგანიზებაზე მუშაობს. აგრეთვე შესაბამისი მითითებები მივეცით სოფლის მეურნეობის სამინისტროს, რათა მოამზადოს ეს ახალი ლოჯისტიკური მარშრუტი," — აღნიშნა ვიცეპრემიერმა.

ეს ნაბიჯი აზერბაიჯანის პრეზიდენტ ილჰამ ალიევის განცხადებას მოჰყვა, რომელმაც ოქტომბერში აღნიშნა, რომ სომხეთთან ყველა სავაჭრო შეზღუდვა მოხსნილია და პირველი ტვირთი — ყაზახური ხორბალი — აზერბაიჯანიდან სომხეთში წავა.

"ეს უმნიშვნელოვანესი განცხადებაა, და მსურს მადლობა გადავუხადო აზერბაიჯანის პრეზიდენტს ამ ნაბიჯისთვის და მივესალმო ამ ინიციატივას," — განაცხადა სომხეთის პრემიერმინისტრმა, ნიკოლ ფაშინიანმა და დაამატა, რომ აზერბაიჯანიდან სომხეთში საქონლის ტრანზიტი "რამდენიმე თვის წინაც კი წარმოუდგენელი იქნებოდა."

ფაშინიანმა ცალკე აღნიშნა:

"ჩვენ მზად ვართ, არა მხოლოდ პოლიტიკური, არამედ ტექნიკური თვალსაზრისითაც, დღესვე უზრუნველვყოთ სატვირთო მანქანების ტრანზიტი თურქეთიდან აზერბაიჯანში და აზერბაიჯანიდან თურქეთში, სომხეთის ტერიტორიის გავლით."

იგივე შეეხება აზერბაიჯანსა და მის ექსკლავს — ნახიჩევანს შორის ტრანზიტს სომხეთის ტერიტორიაზე, თუმცა ფაშინიანის თქმით, "ტექნიკურად ჯერ მზად არ ვართ, ინფრასტრუქტურის არარსებობის გამო."

ფაშინიანმა აღნიშნა, რომ ყველა მიმართულებით სარკინიგზო ხაზების ამოქმედებისთვის აღდგენითი სამუშაოების ჩატარებაა საჭირო.

ამავე გამოსვლაში პრემიერმინისტრმა ნახიჩევანს შორის დაგეგმილ სარკინიგზო კავშირზე ისაუბრა, რომელიც ცნობილია როგორც Trump Route ან TRIPP.

"ვადასტურებთ ჩვენს მზაობას, კეთილსინდისიერად გავაგრძელოთ მუშაობა ამ მიზნის რაც შეიძლება სწრაფად მისაღწევად," — განაცხადა ფაშინიანმა, თუმცა პროექტის დასრულების ზუსტი ვადები არ დაუსახელებია.

ორშაბათს, 27 ოქტომბერს, ფაშინიანმა კიდევ ერთხელ განაცხადა, რომ სომხეთი მზად არის, ორმხრივად უზრუნველყოს სატვირთო ტრანზიტი თურქეთსა და აზერბაიჯანს შორის თავისი ტერიტორიის გავლით და ეს პროცესი შეიძლება "დღესვე დაიწყოს."

"ზუსტად ისე, როგორც აზერბაიჯანმა გააუქმა ტრანზიტის შეზღუდვები ჩვენთვის, ჩვენც ვაუქმებთ შეზღუდვებს მათთვის," — აღნიშნა ფაშინიანმა.

აგვისტოში ილჰამ ალიევმა და ნიკოლ ფაშინიანმა ვაშინგტონში, აშშ-ის პრეზიდენტ დონალდ ტრამპის შუამავლობით, ისტორიული შეხვედრა გამართეს, რომლის დროსაც ხელი მოაწერეს სამშვიდობო შეთანხმების საწყის ვარიანტს, თუმცა დოკუმენტი საბოლოოდ არ გაფორმებულა.

მიმდინარე სამშვიდობო პროცესის ფარგლებში, ორი ქვეყანა მუშაობს ურთიერთობების ნორმალიზებასა და დახურული საზღვრების გახსნაზე ვაჭრობისა და რეგიონული კავშირების განვითარების მიზნით.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.