რუსეთის ფედერაციის პრეზიდენტის პრესმდივანმა დიმიტრი პესკოვმა განაცხადა, რომ დონალდ ტრამპის განცხადების მიუხედავად, რუსეთი უკრაინაში "სპეციალურ სამხედრო ოპერაციას" აგრძელებს. ამასთან ერთად, მოსკოვი ხაზს უსვამს, რომ შედეგის მშვიდობიანი გზით მიღწევა სურს. ამის შესახებ ინფორმაციას TASS ავრცელებს.

"სპეციალური სამხედრო ოპერაცია გრძელდება და ჩვენ კვლავაც ერთგული ვრჩებით მშვიდობიანი პროცესის მიმართ, კონფლიქტის მოგვარებისა და ამ პროცესში ჩვენი ინტერესების უზრუნველყოფის გზით", — თქვა კრემლის პრესსპიკერმა.

ცნობისთვის, ტრამპი აცხადებდა, რომ რუსეთს ომის შესაჩერებლად 50-დღიან ვადას აძლევდა, წინააღმდეგ შემთხვევაში რუსეთისა და მისი სავაჭრო პარტნიორების წინააღმდეგ 100-პროცენტიანი სავაჭრო ტარიფების დაწესებას გეგმავდა.

თუმცა, ორშაბათს ამერიკის ლიდერმა განაცხადა, რომ რუსეთითა და პროცესის პროგრესით იმედგაცრუებულია და ამიტომ ვადას 10-12 დღემდე ამცირებს. გარდა ამისა, ტრამპმა თქვა, რომ აღარ აქვს სურვილი ესაუბროს რუსეთის პრეზიდენტ ვლადიმერ პუტინს, თუმცა არ დაუკონკრეტებია, რა სახის ან რა საკითხზე კონტაქტს გულისხმობდა.