"ვინც "გორბიზე" სერიოზულ მსჯელობას იწყებს, თავადვე ექცევა იმ პროპაგანდის გავლენის ქვეშ და მსხვერპლად, რასაც "გორბი" და ივანიშვილი ისახავს მიზნად," — ამის შესახებ კოალიცია ლელო — ძლიერი საქართველოს ლიდერი ირაკლი კუპრაძე სოციალურ ქსელში წერს.

მისი განცხადებით, ოცნებას თბილისში მხოლოდ 24%-იანი მხარდაჭერა აქვს, რეგიონებში კი საშუალოდ 31%.

"ჭეშმარიტება რამდენიმე პუნქტად:

"გორბის" ყველა კვლევა იყო და არის ყალბი! ყოველთვის ასე იყო 13 წლის განმავლობაში და იგივე ხდება დღესაც.

"გორბი" პირველ რიგში აყალბებს ქართული ოცნების რეიტინგს, რომელიც მარცხისთვისაა განწირული. სინამდვილეში, თბილისში ოცნებას 24% აქვს, რეგიონებში კი საშუალოდ 31%. ოცნება წაგებული პარტიაა.

გამყალბებელი ორგანიზაციის შედეგებზე სერიოზული კომენტარის გაკეთება და დასკვნების გამოტანა კი მხოლოდ 2 მიზეზით შეიძლება მოხდეს:

1. პოლიტიკური და პარტიული სპეკულაცია, რაც სოციალურ ქსელში მრავლად ვნახე.
ან/და

2. ვინც "გორბიზე" სერიოზულ მსჯელობას იწყებს, თავადვე ექცევა იმ პროპაგანდის გავლენის ქვეშ და მსხვერპლად, რასაც "გორბი" და ივანიშვილი ისახავს მიზნად.

არცერთი ვერსია არ არის მომხიბვლელი.

იმედია, ამას სწორად გაიაზრებს ოპოზიციური საზოგადოება, რომ "გორბის" სიყალბის სერიოზული შეფასება და ანალიტიკა, ამ ფონზე კი ახალი დაპირისპირებების შექმნა მხოლოდ ივანიშვილის ინტერესებშია," — წერს ირაკლი კუპრაძე სოციალურ ქსელში.

საზოგადოებრივი აზრის და ბიზნესის კვლევის საერთაშორისო ცენტრმა "გორბიმ" ტელეკომპანია "იმედის" დაკვეთით კვლევა ჩაატარა, რომლის შედეგებიც გუშინ, 28 ივლისს გამოქვეყნდა.

კითხვაზე, პარლამენტის არჩევნები ამ კვირას რომ ტარდებოდეს ვის მისცემდით ხმას შემდეგი პარტიებიდან? — "გორბის"ცნობით, შედეგები ასე გადანაწილდა:

56,2% — ქართულ ოცნება;

10,7% — ლელო — ძლიერი საქართველო;

10% — გახარია საქართველოსთვის;

9,5% — კოალიცია ცვლილებისთვის, გვარამია, მელია, გირჩი, დროა;

7,5% — ერთიანი ნაციონალური მოძრაობა;

3,2% — გირჩი;

1,8% — საქართველოს პატრიოტთა ალიანსu;

1,1 % — სხვა პარტიები.

"გორბის" ინფორმაციით, საველე სამუშაოები 2025 წლის 22 ივნისი-5 ივლისს შესრულდა. შედგა 2300 პირისპირი ინტერვიუ საქართველოს ზრდასრულ მოქალაქესთან (18 წლის და მეტი ასაკის). ორგანიზაციის ცნობით, წარმოდგენილი მონაცემები შეწონილია როგორც დემოგრაფიული, ასევე პოლიტიკური წონით (2024 წლის საპარლამენტო არჩევნებში გაცხადებული ხმის მიცემის და ოფიციალური შედეგების თანაფარდობით) და წარმოდგენილია სავარაუდო ამომრჩევლის ჭრილში.

მათივე ცნობით, სავარაუდო ამომრჩეველი გამოვლინდა არჩევნებში მონაწილეობის მზაობასთან დაკავშირებულ შეკითხვებზე გაცემული პასუხებიდან გამომდინარე. ცდომილების ზღვარი: +/-3% სავარაუდო ამომრჩეველი, ქვეყნის მასშტაბით.