"თუ ჩვენი არჩევანი არის ის თავისუფლება, რომელიც ევროპულ გზაზე გადის, მაშინ ჩვენს ხელისუფლებას ვალდებულებების შესრულება უნდა მოვთხოვოთ და არ გავიშვიროთ თითი ბრიუსელისკენ, რომელმაც ვალდებულებების შეუსრულებლობის შემთხვევაში, შესაძლოა უვიზო მიმოსვლის შეჩერების მექანიზმი აამოქმედოს" — ამის შესახებ ოპოზიციონერმა პოლიტიკოსმა, თეონა აქუბარდიამ "პალიტრანიუსის" ეთერში, გადაცემა "დღის ნიუსრუმში" ისაუბრა.

აქუბარდიას თქმით, თბილისი ევროკავშირის რეკომენდაციებს აღარ ასრულებს, რის გამოც უვიზო რეჟიმის შენარჩუნება კითხვის ნიშნის ქვეშ დგას. მისი განცხადებით, პასუხისმგებლობა ხელისუფლებას ეკისრება და არა ბრიუსელს.

"უვიზო მიმოსვლა იყო და არის მნიშვნელოვანი თავისუფლება საქართველოს მოქალაქეებისთვის. ოფიციალური ბრიუსელის რეკომენდაციებს საქართველო აღარ ასრულებს. უვიზო მიმოსვლის შენარჩუნება არის საქართველოს მოქალაქეებისთვის მნიშვნელოვანი კარი ევროპაში. ამ კარის დახურვა არის მნიშვნელოვანი შესაძლებლობა რუსეთისთვის, რომ საქართველოს დასავლეთისგან სრული იზოლაცია მოხდეს, რასაც ქართული ოცნება ხელს უწყობს. საქართველოს მოქალაქეებმა პასუხი უნდა მოვთხოვოთ საქართველოს მმართველ ძალას. თუ ჩვენი არჩევანი არის ის თავისუფლება, რომელიც ევროპულ გზაზე გადის, მაშინ ჩვენს ხელისუფლებას ვალდებულებების შესრულება უნდა მოვთხოვოთ და არ გავიშვიროთ თითი ბრიუსელისკენ, რომელმაც ვალდებულებების შეუსრულებლობის შემთხვევაში, შესაძლოა უვიზო მიმოსვლის შეჩერების მექანიზმი აამოქმედოს," — განაცხადა აქუბარდიამ.

მისივე თქმით, ივნისში ბრიუსელში დაგეგმილი მოსმენა საბოლოო გადაწყვეტილებას არ ნიშნავს და პროცესი მომავალ წლებშიც გაგრძელდება.