გორის მუნიციპალიტეტის სოფელ ატენში შინაგან საქმეთა სამინისტროს გორის რაიონული სამმართველოს დეტექტივი, ბაქარ ბექაური გარდაცვლილი იპოვეს. ფაქტზე გამოძიება საქართველოს პროკურატურამ სისხლის სამართლის კოდექსის 115-ე მუხლით დაიწყო, რაც თვითმკვლელობამდე მიყვანას გულისხმობს.

შიდა ქართლისა და მცხეთა-მთიანეთის საოლქო პროკურატურის საგამოძიებო სამმართველოს ინფორმაციით, სამართალდამცველი 7 ივნისს სოფელ ატენში გარდაცვლილი იპოვეს.

"შინაგან საქმეთა სამინისტროს გორის რაიონული სამმართველოს დეტექტივის გარდაცვალების ფაქტზე, შიდა ქართლისა და მცხეთა-მთიანეთის საოლქო პროკურატურის საგამოძიებო სამმართველომ გამოძიება სისხლის სამართლის კოდექსის 115-ე მუხლით (თვითმკვლელობამდე მიყვანა) დაიწყო.

გორის რაიონული სამმართველოს თანამშრომელი დღეს, სოფელ ატენში, გარდაცვლილი იპოვეს.

მიმდინარეობს შესაბამისი გადაუდებელი საგამოძიებო მოქმედებები," — ნათქვამია პროკურატურის განცხადებაში.

გარდაცვალების ფაქტთან დაკავშირებით შსს-მ გარდაცვლილის ოჯახსა და ახლობლებს მიუსამძიმრა.

"შინაგან საქმეთა სამინისტრო ღრმა მწუხარებას გამოთქვამს შიდა ქართლის პოლიციის დეპარტამენტის თანამშრომლის, ბაქარ ბექაურის გარდაცვალების გამო და უსამძიმრებს დაღუპულის ოჯახსა და ახლობლებს.

გორის პოლიციის განყოფილების დეტექტივი ბაქარ ბექაური მიმდინარე წლის 7 ივნისს გარდაცვლილი იპოვეს სოფელ ატენში. გამოძიება სისხლის სამართლის კოდექსის 115-ე მუხლით მიმდინარეობს, რაც თვითმკვლელობამდე მიყვანას გულისხმობს. ფაქტთან დაკავშირებით გამოძიება საქართველოს პროკურატურამ დაიწყო", — აღნიშნულია
შსს-ის განცხადებაში.

"ფორმულას" ინფორმაციით, გარდაცვლილი პოლიციელი, სავარაუდოდ, 27 მაისს, გორში, პოლიციელების მხრიდან მოქალაქე პაპუნა ლოცულაშვილზე ჩადენილ ჯგუფურ თავდასხმაში მონაწილეობდა — როგორც გარდაცვლილის მეზობლები ჰყვებიან, ბაქარ ბექაური იმ კადრებშიც ჩანს, რომელიც საჯაროდ გავრცელდა.