ოკუპირებულ დასავლეთ სანაპიროზე ისრაელის ჯარისკაცებმა 7 თვის პალესტინელი ჩვილი მოკლეს, მისი მშობლები კი დაჭრეს. სამხედროებმა ოჯახის მანქანას ცეცხლი მას შემდეგ გაუხსნეს, რაც ავტომობილი გაჩერების ბრძანებას დაემორჩილა.

შემთხვევა პარასკევს, ჰებრონში მოხდა. სროლის შედეგად, 7 თვის სემ ფაჰდ აბუ ჰაიკალი მძიმედ დაშავდა. ის საავადმყოფოში კრიტიკულ მდგომარეობაში გადაიყვანეს, თუმცა ვერ გადაარჩინეს.

ისრაელის არმიის მტკიცებით, ჯარისკაცებმა ცეცხლი გაუხსნეს ავტომობილს, რომელიც მათი მიმართულებით დიდი სისწრაფით მიემართებოდა. თუმცა, პირველადი მოკვლევით დადგინდა, რომ დაზარალებულები უდანაშაულო სამოქალაქო პირები იყვნენ.

ოჯახის ავტომობილი, რომელსაც ცეცხლი გაუხსნეს.

ფოტო: Mahmoud Illean

ისრაელის გაზეთთან ერთ-ერთ ინტერვიუში ბავშვის მამამ, ბეთლემის უნივერსიტეტის ლექტორმა ფაჰდ აბუ ჰაიკალმა აღნიშნა, რომ ტყვიამ ჯერ მის ხელში გაიარა, შემდეგ კი უკანა სავარძელზე, დედის მკლავებში მყოფ პატარა სემს მოხვდა. მამის თქმით, პარასკევს საღამოს, როდესაც ისინი ჰებრონში გადაადგილდებოდნენ, ჯარისკაცების მიერ მიცემულ ნიშანზე მანქანა მაშინვე გააჩერეს.

მისი თქმით, ჯერ კიდევ დღე იყო, როდესაც ჯარისკაცმა ცეცხლი გახსნა და გარკვევით შეეძლო დაენახა, რომ მანქანაში ოჯახი იჯდა. ისრაელის თავდაცვის ძალების განცხადებით, ჯარისკაცებს "მოეჩვენათ, რომ მანქანა მათი მიმართულებით მოდიოდა და სიჩქარეს უმატებდა", რის გამოც ერთ-ერთმა სამხედრომ ავტომობილის მიმართულებით გაისროლა.

ნატყვიარი იმ ავტომობილის საქარე მინაზე, რომელშიც 7 თვის სემ ფაჰდ აბუ ჰაიკალს ესროლეს.

აბუ ჰაიკალი სამხედროების ამ ვერსიას უარყოფს.

"ჯარისკაცი ჩემგან დაახლოებით 10 მეტრში იდგა. მან მეც დამინახა, ჩემი ცოლიც და ბავშვებიც დაინახა. მანქანას დაბურული მინები არ ჰქონია, დღის შუქი იყო და ყველაფერი ცხადად ჩანდა. ვერ იტყვიან, თითქოს ვერ შეამჩნიეს, რომ შიგნით ოჯახი იჯდა. როგორც მიბრძანეს, ისე გავჩერდი, მათ კი უბრალოდ სროლა აუტეხეს მანქანას. 7 თვის ჩვილი ცივსისხლიანად მოკლეს. მას ეს არ დაუმსახურებია. იქ არანაირი ოფიციალური გამშვები პუნქტი არ ყოფილა, უბრალოდ ქუჩაში მდგარი ჯარისკაცები იყვნენ", — განაცხადა ბავშვის მამამ ერთ-ერთ ინტერვიუში.

გაეროს გასული თვის მონაცემებით, ომის დაწყების შემდეგ დასავლეთ სანაპიროსა და აღმოსავლეთ იერუსალიმში 1000-ზე მეტი პალესტინელი დაიღუპა, მათგან სულ მცირე 240 ბავშვია.

აბუ ჰაიკალმა გამოძიების დაწყება და დამნაშავე ჯარისკაცის პასუხისგებაში მიცემა მოითხოვა. ისრაელის უფლებადამცველი ორგანიზაციის მონაცემებით, პალესტინელების მიმართ ძალადობაში ბრალდებული ისრაელელი ჯარისკაცები იშვიათად ისჯებიან. 2016-დან 2024 წლამდე დაფიქსირებული 2 427 საჩივრიდან, სამხედროებს ბრალი შემთხვევების 1%-ზე ნაკლებში წარედგინათ.