11 ივნისს ბრიუსელში ქართულ მხარესა და ევროკომისიას შორის პირველი დიალოგი შედგება ვიზალიბერალიზაციაზე. ჟურნალისტის კითხვაზე — რა მოლოდინი გაქვთ?, შალვა პაპუაშვილმა, სავარაუდოდ, სომხეთის საგარეო საქმეთა მინისტრ არარატ მირზოიანის პერიფრაზი გააკეთა, როცა თქვა — "როგორც იტყვიან, სუვერენიტეტი მარწყვზე არ იცვლება".

შეგახსენებთ, რომ რუსეთის მიერ სომხური ხილის ექსპორტის აკრძალვის შემდეგ, სომხეთის საგარეო საქმეთა მინისტრმა არარატ მირზოიანმა განაცხადა, რომ "ჩვენ არ დავთმობთ ჩვენს დამოუკიდებლობას მარწყვის სანაცვლოდ".

"ეს არის ტექნიკური დონის შეხვედრა და არა პოლიტიკური ხასიათის, შესაბამისად, საგარეო საქმეთა სამინისტრომ დააკომპლექტა ჯგუფი, რომელიც მიიღებს მონაწილეობას. ამავე დროს, ჩვენ ვიცით წინაპირობები, რაზეც იყო საუბარი. საუბარი იყო იმაზე, რომ საქართველო მიერთებოდა ევროკავშირის მიერ დაწესებულ სანქციებს რუსეთის წინააღმდეგ და ამაზე ჩვენ ვამბობთ, რომ ჩვენ არ ვაპირებთ ჩვენი ქვეყანა დავანგრიოთ და ომის საფრთხის წინაშე დავაყენოთ.

მეორე იყო მოთხოვნა, რომ საქართველომ უარი თქვას, რომ უცხოელებმა გამჭვირვალედ დახარჯონ ფული და სურს ევროკავშირს, რომ კვლავ ფარულად ხდებოდეს დაფინანსება საქართველოში პოლიტიკური დღის წესრიგისა, როგორც ეს აქამდე ხდებოდა ბრიუსელის მხრიდან. ამაზე ჩვენ ვთქვით, რომ ეს შეუძლებელია გამომდინარე ჩვენი სუვერენიტეტის პატივისცემიდან.

ასე რომ, სამწუხაროა ის, რომ ვიზალიბერალიზაციას აქვს თავისი პროცედურები, თავისი წინაპირობები. სამწუხაროდ, ჩვენ რაც ვიხილეთ არის ის, რომ ნაცვლად ვიზალიბერალიზაციისთვის მნიშვნელოვანი კრიტერიუმებისა, მოხდა პოლიტიკური წინაპირობების გამოგონება და წამოყენება საქართველოს წინააღმდეგ, რომელიც პირდაპირ არღვევს ჩვენი ქვეყნის სუვერენიტეტს, რომ თავად განსაზღვროს საკუთარი სახელმწიფო დღის წესრიგი. ასე რომ, როგორც იტყვიან, სუვერენიტეტი მარწყვზე არ იცვლება", — განაცხადა პაპუაშვილმა.

შეგახსენებთ, რომ ევროკავშირი 11 ივნისს, ვიზების საკითხთან დაკავშირებით საქართველოსთან დიალოგს გამართავს.