ევროპული საბჭოს პრეზიდენტი ანტონიო კოშტა სომხეთის პრემიერმინისტრს, ნიკოლ ფაშინიანს საპარლამენტო არჩევნებში გამარჯვებას ულოცავს. ამის შესახებ მან X-ზე დაწერა. კოშტას განმარტებით, "ევროკავშირი და სომხეთი ერთად აშენებენ უფრო მტკიცე კავშირებს ადამიანებს შორის და ქმნიან ახალ შესაძლებლობებს ენერგეტიკის, ვაჭრობისა და ციფრული ტექნოლოგიების სფეროებში".

"სომეხმა ხალხმა ხმა მისცა მომავალს, რომელიც დაფუძნებულია მშვიდობაზე, სტაბილურობასა და მეზობლებთან და მთელ მსოფლიოსთან უფრო მჭიდრო თანამშრომლობაზე.

ვულოცავ ნიკოლ ფაშინიანს ამ შედეგებს. თქვენ შეგიძლიათ იამაყოთ თქვენი როლით სომხეთის მდგრადობის, სტაბილურობისა და კეთილდღეობის გაძლიერებაში.

ევროკავშირი და სომხეთი ერთად აშენებენ უფრო მტკიცე კავშირებს ადამიანებს შორის და ქმნიან ახალ შესაძლებლობებს ენერგეტიკის, ვაჭრობისა და ციფრული ტექნოლოგიების სფეროებში. ჩვენი ძლიერი პარტნიორობა არის ინვესტიცია მთელი რეგიონის უფრო მშვიდობიან და აყვავებულ მომავალში", — დაწერა ანტონიო კოშტამ.

შეგახსენებთ, სომხეთის ცენტრალურმა საარჩევნო კომისიამ საპარლამენტო არჩევნებზე ყველა — 2005-ივე საარჩევნო უბნის ხმების დათვლის წინასწარი შედეგები გამოაქვეყნა.

პრემიერმინისტრ ნიკოლ ფაშინიანის პარტია სამოქალაქო კონტრაქტმა ყველაზე მეტი — 727,160 ხმა (49.81%) მოიპოვა. სემველ კარაპეტიანის ძლიერი სომხეთი მეორე ადგილზეა 340,062 ხმით (23.29%), მას მოსდევს ყოფილი პრეზიდენტის, რობერტ ქოჩარიანის ალიანსი სომხეთი, რომელმაც 145,097 ხმა (9.94%) მიიღო. გაგიკ წარუკიანის პარტიამ აყვავებული სომხეთი 58,368 ხმით მოაგროვა ბარიერის გადასალახად საჭირო 4%.