ევროკომისარმა გაფართოების საკითხებში, მარტა კოსმა სომხეთის პრემიერმინისტრს ნიკოლ ფაშინიანს საპარლამენტო არჩევნებში გამარჯვება მიულოცა. ამის შესახებ მან X-ზე დაწერა.

კოსის თქმით, მიუხედავად რუსეთის მხრიდან მასშტაბური ჩარევისა სომეხმა ხალხმა არჩევანი ძლიერ, სუვერენულ და დამოუკიდებელ სომხეთზე გააკეთა. ის იმასაც წერს, რომ სომხეთში რაც შეიძლება მალე ჩავა.

" ნიკოლ ფაშინიან, გილოცავთ სომხეთის არჩევნებში მიღწეულ წარმატებას.

რუსეთის მხრიდან მასშტაბური იძულებისა და ჩარევის ფონზე, ეს გამარჯვება ხელახლა ადასტურებს სომეხი ხალხის არჩევანს ძლიერი, სუვერენული და დამოუკიდებელი სომხეთის სასარგებლოდ.

სომხეთში რაც შეიძლება მალე ჩამოვალ — ევროპის სოლიდარობა სომხეთის მიმართ ურყევია.

დღესვე, ჩვენი პარტნიორობის გასაღრმავებლად, მუშაობას დავიწყებთ ევროკავშირი-სომხეთის ახალ სამუშაო ჯგუფში", — დაწერა მარტა კოსმა.

შეგახსენებთ, სომხეთის ცენტრალურმა საარჩევნო კომისიამ საპარლამენტო არჩევნებზე ყველა — 2005-ივე საარჩევნო უბნის ხმების დათვლის წინასწარი შედეგები გამოაქვეყნა.

პრემიერმინისტრ ნიკოლ ფაშინიანის პარტია სამოქალაქო კონტრაქტმა ყველაზე მეტი — 727,160 ხმა (49.81%) მოიპოვა. სემველ კარაპეტიანის ძლიერი სომხეთი მეორე ადგილზეა 340,062 ხმით (23.29%), მას მოსდევს ყოფილი პრეზიდენტის, რობერტ ქოჩარიანის ალიანსი სომხეთი, რომელმაც 145,097 ხმა (9.94%) მიიღო. გაგიკ წარუკიანის პარტიამ აყვავებული სომხეთი 58,368 ხმით მოაგროვა ბარიერის გადასალახად საჭირო 4%.