გაერთიანებული სამეფოს პრემიერმინისტრი კირ სტარმერი, საფრანგეთის პრეზიდენტი ემანუელ მაკრონი და გერმანიის კანცლერი ფრიდრიხ მერცი 7 ივნისს უკრაინის პრეზიდენტ ვოლოდიმირ ზელენსკის შეხვდნენ. ლიდერებმა კიდევ ერთხელ დაადასტურეს უკრაინისადმი ურყევი მხარდაჭერა რუსეთის აგრესიის წინააღმდეგ ბრძოლაში და იმსჯელეს სამართლიანი და მდგრადი მშვიდობის მისაღწევად საჭირო ნაბიჯებზე. ამის შესახებ ინფორმაციას ბრიტანეთის მთავრობის ოფიციალური გვერდი ავრცელებს.

მხარეებმა აღნიშნეს, რომ ევროპას მნიშვნელოვანი როლი უნდა ჰქონდეს ნებისმიერი სამშვიდობო შეთანხმების პროცესში, როგორც უკრაინის ერთგულ პარტნიორს. მათი განცხადებით, ყველა ძალისხმევა მჭიდრო კოორდინაციით უნდა განხორციელდეს უკრაინასთან, ევროპელ პარტნიორებსა და აშშ-სთან.

ლიდერებმა დადებითად შეაფასეს უკრაინის ბოლოდროინდელი სამხედრო წარმატებები, მათ შორის ტერიტორიების გათავისუფლება და დრონების ტექნოლოგიის ინოვაციური გამოყენება.

ამასთან, მათ მკაცრად დაგმეს რუსეთის მასშტაბური სარაკეტო და დრონებით განხორციელებული თავდასხმები უკრაინულ ქალაქებზე, მათ შორის "ორეშნიკის" ტიპის რაკეტების გამოყენება, რასაც მშვიდობიან მოსახლეობაში მსხვერპლი მოჰყვა. ასევე დაგმეს რუსეთის უპასუხისმგებლო დრონების შეჭრა ნატოს წევრი ქვეყნების საჰაერო სივრცეში.

შეხვედრაზე განიხილეს, თუ როგორ შეიძლება გამოყენებულ იქნას ევიანში დაგეგმილი "დიდი შვიდეულის" (G7) სამიტი, "მსურველთა კოალიციის" შემდეგი შეხვედრა და ნატოს სამიტი ანკარაში უკრაინის დამატებითი მხარდაჭერის კოორდინაციისთვის. ლიდერებმა ხაზი გაუსვეს რუსეთის სამხედრო ეკონომიკაზე ზეწოლის გაზრდის, უკრაინისთვის სამხედრო დახმარების გაფართოებისა და საჰაერო თავდაცვის შესაძლებლობების გაძლიერების აუცილებლობას.

მათ ასევე იმსჯელეს უკრაინის შეიარაღებული ძალების გრძელვადიან მდგრადობაზე, ანტისარაკეტო სისტემების წარმოების ზრდასა და ევროპისა და უკრაინის სამხედრო-სამრეწველო თანამშრომლობის გაღრმავებაზე.

მშვიდობის მიღწევის პირობებზე საუბრისას, ლიდერებმა ხუთი ძირითადი პრინციპი გამოყვეს:

1. რუსეთის პრეზიდენტი ვლადიმირ პუტინი დაუყოვნებლივ და სრულ ცეცხლის შეწყვეტას უნდა დათანხმდეს;

2. მოლაპარაკებების საწყის საფუძვლად არსებული ფრონტის ხაზი უნდა იქცეს, ხოლო საზღვრების ძალის გამოყენებით შეცვლა დაუშვებელია;

3. უკრაინას ცეცხლის შეწყვეტის შემდეგ უნდა ჰქონდეს ძლიერი და იურიდიულად სავალდებულო უსაფრთხოების გარანტიები, მათ შორის მრავალეროვნული სამხედრო ძალის განთავსება;

4.რუსეთის აქტივები გაყინული დარჩება მანამ, სანამ მოსკოვი ომს არ შეწყვეტს და უკრაინისთვის მიყენებულ ზარალს არ აანაზღაურებს;

5. ნებისმიერი შეთანხმება უნდა ითვალისწინებდეს ევროპის უსაფრთხოების ინტერესებს, ხოლო ევროკავშირსა და ნატოსთან დაკავშირებული საკითხები შესაბამისი წევრების თანხმობით უნდა გადაწყდეს.

ლიდერებმა ასევე მხარი დაუჭირეს პრეზიდენტ ზელენსკის ინიციატივას, რომელიც ომის დიპლომატიური გზით დასრულებას ითვალისწინებს. მათ მოიწონეს უკრაინასა და რუსეთს შორის პირდაპირი დიალოგის იდეა, აშშ-ისა და ევროპელი პარტნიორების აქტიური მონაწილეობით, რაც ცეცხლის შეწყვეტისა და შემდგომი მოლაპარაკებების დაწყებას შეუწყობს ხელს.

შეხვედრის დასასრულს კირ სტარმერმა, ემანუელ მაკრონმა და ფრიდრიხ მერცმა კიდევ ერთხელ დაადასტურეს, რომ უკრაინის მხარდაჭერას მომავალშიც გააგრძელებენ.