ჯენა ორტეგა კამერის მეორე მხარეს ინაცვლებს — ამერიკელი მსახიობი სარეჟისორო დებიუტისთვის ემზადება. ორტეგა, რომელსაც საყოველთაო პოპულარობა ნეტფლიქსის სერიალმა Wednesday მოუტანა, უახლეს ინტერვიუში ამბობს, რომ თითქმის მთელი ათწლეულია, სცენარზე მუშაობს.

"ლამის ათი წელია, რაც სცენარი მაქვს და მის გადაღებას ვგეგმავ", — აღნიშნავს ორტეგა, — "უცნაურია, რომ ამაზე ჯერ კიდევ მაშინ ვფიქრობდი, როცა კინოინდუსტრიაში პირველ ნაბიჯებს ვდგამდი, მაგრამ მხოლოდ ახლაღა დავიწყე აქტიურად მუშაობა. ყველაფერს ნაწილ-ნაწილ ვაწყობ ჩემს გონებაში, ამიტომ, რამდენიმე წელი დამჭირდა, რომ გამეგო, რა როგორ კეთდება".

ჯენას თქმით, რეჟისორობასთან ერთად, სურს, პროდიუსერის როლი მოირგოს და თავადაც ითამაშოს ფილმში.

ფოტო: Jamie McCarthy / Getty Images

სხვათა შორის, პროდიუსერის სკამი ორტეგას აქამდეც დაუკავებია — იგი სულ ახლახან გამოსული ფილმის, Death of a Unicorn-ის, აღმასრულებელი პროდიუსერია. ამავე ფილმში მან მთავარი როლიც შეასრულა. მალე ჯენას პროდიუსერობით კიდევ ერთი ფილმი, Hurry Up Tomorrow, გამოვა. მსახიობი Wednesday-ის ახალი სეზონის აღმასრულებელ პროდიუსერადაც მოგვევლინება.

როგორც ჩანს — და ამას თავადაც ამბობს — ორტეგას სამომავლოდ უფრო მეტად კადრს მიღმა მუშაობა სურს. მსახიობის სახელი კი ტრამპლინადაც შემიძლია გამოვიყენოო, ამატებს ჯენა.

ასევე იხილეთ: