ოცნების პრემიერი ირაკლი კობახიძე და ოცნების პარლამენტის თავმჯდომარე შალვა პაპუაშვილი ბათუმელების და ნეტგაზეთის დამფუძნებლისა და დირექტორის, ამაღლობელის სასამართლო პროცესზე დასწრების გამო აკრიტიკებენ.

• მზია ამაღლობელის საქმის განხილვას ლიეტუვის ელჩი და ნორვეგიის და დიდი ბრიტანეთის საელჩოების წარმომადგენლები ესწრებიან

ირაკლი კობახიძის თქმით, ეს არის პირდაპირი პოლიტიკური ჩარევა ქართული მართლმსაჯულების დამოუკიდებლობაში.

"ეს არის პირდაპირი პოლიტიკური ჩარევა ქართული მართლმსაჯულების დამოუკიდებლობაში. ეს არის დღესავით ნათელი. მე ყველას მოვუწოდებ, დაიცვან საქართველოს კონსტიტუცია, მისი პრინციპები. ასევე დაიცვან კონვენციები, რომლითაც არიან შებოჭილი უცხოელი ელჩები, რომლებიც მუშაობენ საქართველოში. დღემდე სამწუხაროდ, ეს პრინციპები და კონსტიტუციური ნორმები დაცული არ არის, იმედია, მომავალში ეს ყველაფერი გამოსწორდება", — განაცხადა ირაკლი კობახიძემ.

შალვა პაპუაშვილის თქმით, ელჩების დასწრებას სასამართლო პროცესებზე ერთი დანიშნულება აქვს — ზეწოლა ქართულ მართლმსაჯულებაზე და მოსამართლეების დაშინება , რაც ეს ქმედება საქართველოს სუვერენიტეტის უპატივცემულობაა.

"ყველას კარგად უნდა ესმოდეს, რომ ერთადერთი დატვირთვა, რაც მათ ყოფნას სასამართლო დარბაზში აქვს, ეს არის ზეწოლა მართლმსაჯულებაზე და მოსამართლეების დაშინება. იმიტომ, რომ ჩვენ ვხედავთ სასამართლო დარბაზებში, იმ საელჩოების წარმომადგენლებს, რომლის ხელისუფლებები შემდეგ რაღაც სავიზო შეზღუდვებს უწესებენ მოსამართლეებს. ეს კინო ჩვენ ვნახეთ, როდესაც აშშ-ს ელჩმა, კელი დეგნანმა და მისმა საელჩომ ნიკა გვარამიას საქმის მოსამართლე დაიბარეს, ანგარიში ჩამოართვეს, "რატომ მიიღე ასეთი გადაწყვეტილება" საყვედური უთხრეს და შემდეგ ამოიღეს ყველა პროგრამიდან, რომელიც ამერიკის საელჩოს ფარგლებში ხორციელდებოდა.

კიდევ ერთხელ, ეს არის ვენის კონვენციის და წესებზე დაფუძნებული საერთაშორისო წესრიგის წინააღმდეგ წასვლა. კიდევ ერთხელ ვიტყვი, სამი პოსტსაბჭოთა რესპუბლიკა ისე გაერთო ურჩხულებთან ბრძოლას, რომ თავად ემსგავსება ურჩხულს," — აღნიშნა პაპუაშვილმა.

გარდა ამისა, პაპუაშვილი ბელგიის საგარეო საქმეთა სამინისტროსაც აკრიტიკებს. უწყებამ განცხადება "ბათუმელების" და "ნეტგაზეთის" დამფუძნებლის, მზია ამაღლობელის საქმესთან დაკავშირებით X-ზე გაავრცელა. ბელგია საქართველოს ხელისუფლებას მოუწოდებს, სიტყვისა და მშვიდობიანი შეკრების თავისუფლებას პატივი სცეს.

პაპუაშვილი აცხადებს, რომ ბელგიის მთავრობის პოზიცია მისთვის ცნობილია ევროპარლამენტის რეზოლუციიდან, სადაც მათმა წარმომადგენლებმა მხარი დაუჭირეს კრიმინალების გათავისუფლებას. მისი თქმით, " ეს აჩვენებს მათ დამოკიდებულებას კანონის უზენაესობის მიმართ".

"კანონის უზენაესობის გარეშე დემოკრატია არ არსებობს. შესაძლოა მათთვის კანონის უზენაესობა სხვა ქვეყნებში იმდენად მნიშვნელოვანი არ არის, როგორც საკუთარ ქვეყნებში და ეს გამოჩნდა კიდევაც, მაშინ როდესაც ბელგიის ხელისუფლების წარმომადგენლებმა ევროპარლამენტში ([ვგულისხმობ], სახელისუფლებო პარტიის წარმომადგენლებს) მხარი დაუჭირეს რეზოლუციას, რომლითაც ითხოვენ კრიმინალი სააკაშვილის გათავისუფლებას და ასევე ითხოვენ კრიმინალი კეზერაშვილის შერაცხვას მედია გურუდ. ბელგიის მთავრობის პოზიცია ჩვენთვის ცნობილია ევროპარლამენტის რეზოლუციიდან, სადაც მათმა წარმომადგენლებმა მხარი დაუჭირეს კრიმინალების გათავისუფლებას სასჯელაღსრულების დაწესებულებიდან. ასე რომ, ეს აჩვენებს მათ დამოკიდებულებას კანონის უზენაესობის მიმართ სხვა ქვეყნებში. როგორც ჩანს, ზოგიერთ ხელისუფლებას ქართველი ხალხისთვის არ ემეტება კანონის უზენაესობა, დემოკრატია, არჩევნები. როგორც ჩანს, ზოგს სურს, რომ ის რაც მათთვის კარგია და იუპიტერისთვის კარგია, ჩვენ ალბათ, ხარები ვართ და არ გვაქვს უფლება, რომ ჩვენ გვქონდეს მართლწესრიგი და კანონმდებლობა", — განაცხადა პაპუაშვილმა.

• ბელგია საქართველოს ხელისუფლებას მოუწოდებს, სიტყვისა და მშვიდობიანი შეკრების თავისუფლებას პატივი სცეს