"საბანკო სისტემა საერთაშორისო საფინანსო სისტემის განუყოფელი ნაწილია. ის განუხრელად იცავდა და დაიცავს აშშ-ს, ევროკავშირის და გაერთიანებული სამეფოს მიერ დაწესებულ სანქციებს და გადაწყვეტილებებს მათთან შესაბამისობაში იღებს", — ამის შესახებ საბანკო ასოციაცია აცხადებს.

საქართველოს წამყვან ბანკებს: თიბისის და საქართველოს ბანკს მედია "ტაბულამ" კითხვით მიმართა, ვახტანგ გომელაურისა და შსს-ს სხვა მაღალჩინოსნების წინააღმდეგ დაწესებული სანქციების თაობაზე. მათი კითხვა იყო, თუ რამდენად აღასრულებენ სანქციებს ქართული ბანკები და გაუყინავენ თუ არა სანქცირებულ პირებს ანგარიშებს, რაზეც ორივე ბანკის პასუხი იყო ის, რომ ერთიან შეთანხმებულ განცხადებას საბანკო ასოციაცია გაავრცელებდა.

საქართველოს საბანკო ასოციაციაში 14 ბანკი შედის: ბაზის ბანკი, ბანკი ქართუ, ზირაათ ბანკი, თიბისი ბანკი, იშბანკი, კრედო ბანკი, ლიბერთი ბანკი, პაშა ბანკი, პროკრედიტ ბანკი, საქართველოს ბანკი, სილქ ბანკი, ხალიკ ბანკი საქართველო, ტერა ბანკი, პეისერა ბანკი საქართველო.

შეგახსენებთ, გუშინ, 19 დეკემბერს აშშ-ს სახაზინო დეპარტამენტმა "ოცნების" შსს-ს მინისტრს, ვახტანგ გომელაურს და განსაკუთრებულ დავალებათა დეპარტამენტის (გდდ) უფროსის, ზვიად ხარაზიშვილის (ე.წ. ხარება) მოადგილეს, მირზა კეზევაძეს ფინანსური სანქციები მაგნიტსკის აქტის ფარგლებში დაუწესა.

"მაგნიტსკის სიით" გათვალისწინებული სანქციები ადამიანის უფლებების დარღვევის ან კორუფსიის წინააღმდეგ მიღებულ ზომებს ისახავს მიზნად.

იმავე დღეს, შსს-ს მაღალჩინოსნებს სანქციები დაუწესა დიდმა ბრიტანეთმაც, ხოლო სანქცირების მიზეზად დასახელდა ევროკავშირში გაწევრიანების პროცესის შეჩერების შემდგომ დაწყებულ პროტესტებზე, ჟურნალისტებისა და მშვიდობიანი მომიტინგეების მიმართ ძალადობა. სანქციები ითვალისწინებს, როგორც სავიზო, ისევე ეკონომიკურ სანქციებს.

დღეს, 20 დეკემბერს, ირაკლი კობახიძემ სანქცირებული ვახტანგ გომელაური დააწინაურა და ვიცეპრემიერად დანიშნა, ამასთან დასძინა, რომ "თუკი რომელიმე მოხელეს წარმოექმნება რაიმე ფინანსური დანაკლისი ამ [ამერიკული] სანქციებიდან, ქართული სახელმწიფო სრულად უზრუნველყოფს ამ დანაკლისის კომპენსირებას".