პრეზიდენტ სალომე ზურაბიშვილის მიერ, იუსტიციის უმაღლეს საბჭოში არამოსამართლე წევრის შესარჩევად შექმნილი კომისიის წევრების შეფასებით, კონსტიტუციის უხეში დარღვევაა საქალაქო სასამართლოს გადაწყვეტილება, რომლის მიხედვით, პრეზიდენტის განკარგულება, იუსტიციის უმაღლესი საბჭოს წევრად კახა წიქარიშვილის დანიშვნის შესახებ, შეჩერდა.

მსგავსი: "ეს არის სისტემის რეაქცია" — წიქარიშვილი იუსტიციის უმაღლესი საბჭოს წევრად მისი დანიშვნის შეჩერებაზე

"მიგვაჩნია, რომ აღნიშნული გადაწყვეტილებით მოსამართლე ლეილა ფოლადაშვილმა უხეშად დაარღვია საქართველოს კონსტიტუციით გარანტირებული ხელისუფლების დანაწილების პრინციპი და შეიჭრა 52-ე მუხლით გარანტირებულ საქართველოს პრეზიდენტის ექსკლუზიურ უფლებამოსილებაში — დამოუკიდებლად შეარჩიოს და დანიშნოს იუსტიციის საბჭოს ერთი არამოსამართლე წევრი", — განაცხადა გურამ იმნაძემ, კომისიის თავმჯდომარემ დღეს, 23 ივლისს, პრეზიდენტის ადმინისტრაციაში გამართულ საგანგებო ბრიფინგზე.

გაიგე მეტი: ნონა ქურდოვანიძე: საერთო სასამართლოს არ ჰქონდა უფლება პრეზიდენტის განკარგულება შეეჩერებინა

კომისიის წევრების შეფასებით, საქალაქო სასამართლოს გადაწყვეტილება არ ემსახურება კანონის უზენაესობას და საჯარო ინტერესებს და ამ გზით, სასამართლო ცდილობს უხეშად ჩაერიოს დამოუკიდებელი კონსტიტუციური ორგანოს — საქართველოს პრეზიდენტის უფლებამოსილებაში.

"ეს გადაწყვეტილება განსაკუთრებით სახიფათოა იმ ფონზე, რომ ამ გზით, სასამართლომ, ფაქტობრივად, თვითნებურად აღიჭურვა თავი გააკონტროლოს, თუ ვინ შეიძლება დანიშნოს პრეზიდენტმა იუსტიციის უმაღლესი საბჭოს წევრად და ვინ არა".

გუშინ, 22 ივლისს, თბილისის საქალაქო სასამართლომ განაცხადა, რომ პრეზიდენტის განკარგულება, იუსტიციის უმაღლესი საბჭოს წევრად კახა წიქარიშვილის დანიშვნის შესახებ, შეჩერებულია.

მიზეზი პრეზიდენტის მიმართ საქალაქო სასამართლოს ადმინისტრაციულ საქმეთა კოლეგიაში შესული სარჩელია, რომლის ავტორი, მედიაში გავრცელებული ინფორმაციით, ადვოკატი მანუჩარ კაკოჩაშვილია.

ასევე, ნახეთ: "ეს სასამართლოს კლანური მმართველობის კიდევ ერთი დასტურია" — მსხილაძე იუსტიციის საბჭოს წევრად წიქარიშვილის დანიშვნის განკარგულების შეჩერებაზე