ამერიკული გამოცემა Washington Examiner-ის საგარეო პოლიტიკის რედაქტორი, ტომ როგანი ოცნების პრემიერის, ირაკლი კობახიძის მიერ გამოცემის კონტრიბუტორის, ანი ჩხიკვაძის "უცხოური გავლენის აგენტად" და "მოღალატედ" მოხსენიებას გამოეხმაურა.

მან X-ზე დაწერა, რომ მათი "კონტრიბუტორი კარგ საქმეს აკეთებს, როდესაც საქართველოს მთავრობას კორუფციასა და რუსეთისადმი თვითდამორჩილებას აკრიტიკებს".

მანამდე, ბრიფინგზე ირაკლი კობახიძემ ანი ჩხიკვაძის მიერ Washington Examiner-ში გამოქვეყნებული სტატიის შესახებ დასმულ კითხვის საპასუხოდ თქვა, რომ “ეს კონკრეტული ადამიანიც არის უცხოური გავლენის აგენტია”

"ეს კონკრეტული ადამიანიც არის უცხოური გავლენის აგენტი. ის მუშაობდა "ამერიკის ხმაში" — ძალიან კარგად მოგეხსენებათ იგივე პრეზიდენტი ტრამპის დამოკიდებულება "ამერიკის ხმის" მიმართ, ეს მედიასაშუალება იყო დაკავებული ძალიან მძიმე საქმიანობით, მათ შორის, კონკრეტული სახელმწიფოების წინააღმდეგ. ამიტომ გასაკვირი არ არის, რომ დღეს უკვე სხვა მედიასაშუალებიდან აგრძელებს ასეთივე საქმიანობას. რა თქმა უნდა, ეს არის ღალატი საკუთარი ქვეყნის ეროვნული ინტერესების წინააღმდეგ", — თქვა კობახიძემ.

გუშინ, Washington Examiner-მა გამოაქვეყნა სტატია სათაურით: "საქართველოს ქიმიური იარაღის სკანდალი ტრამპის ყურადღებას იმსახურებს", რომელიც BBC-ის საგამოძიებო ფილმს ეხება. სტატიაში აღნიშნულია, რომ საქართველოს მთავრობა BBC-ის გამოძიების შემდეგ მძაფრი კრიტიკის ობიექტი გახდა.

შეგახსენებთ, BBC-ის ინფორმაციით, "ქართულმა ოცნებამ” 2024 წლის აქციებზე დემონსტრანტების დასაშლელად I მსოფლიო ომის დროინდელი ტოქსიკური ნაერთი "კამიტე" გამოიყენა.