ოთხშაბათს, 3 დეკემბერს, გაეროს გენერალური ასამბლეის მე-11 საგანგებო სპეციალურ სესიაზე შეერთებულმა შტატებმა და 90-მა ქვეყანამ მხარი დაუჭირეს რეზოლუციას, რომელიც მოითხოვს, რომ რუსეთმა "დაუყოვნებლივ, უსაფრთხოდ და უპირობოდ" დააბრუნოს უკრაინელი ბავშვები, რომლებიც "იძულებით გადაადგილებულნი ან დეპორტირებულნი" არიან.

რეზოლუცია "უკრაინელი ბავშვების დაბრუნების" შესახებ სხვა ქვეყნების წარმომადგენლებთან ერთად შემოთავაზებული იყო უკრაინისა და კანადის მიერ და კენჭისყრაში 160 ქვეყანა მონაწილეობდა. რეზოლუციის წინააღმდეგ ხმა მისცა თორმეტმა ქვეყანამ, მათ შორის რუსეთმა, ბელორუსმა, კუბამ, ირანმა, ჩრდილოეთ კორეამ, მალიმ და სუდანმა, ხოლო 57-მა თავი შეიკავა. აღსანიშნავია, რომ რეზოლუციას მხარი დაუჭირა შეერთებულმა შტატებმა, რომელმაც დონალდ ტრამპის თეთრ სახლში დაბრუნების შემდეგ არაერთხელ მისცა ხმა რუსეთის მიმართ კრიტიკული რეზოლუციების წინააღმდეგ.

დოკუმენტი ასევე "მკაცრად მოუწოდებს" რუსეთს, შეწყვიტოს ბავშვების "იდეოლოგიური ინდოქტრინაციის", ოჯახებისგან მათი განცალკევებისა და პირადი სტატუსის შეცვლის პრაქტიკა, მათ შორის მოქალაქეობის მინიჭებისა და მინდობით აღზრდაში განთავსების გზით. უკრაინის საგარეო საქმეთა მინისტრის მოადგილის, მარიანა ბეცას თქმით, რუსეთმა დეპორტაცია გაუკეთა მინიმუმ 20 000 უკრაინელ ბავშვს, რომელთაგან ზოგიერთი უკვე დააბრუნეს.

როგორც DW წერს, უკრაინის ხელისუფლებამ არაერთხელ დაადანაშაულა რუსეთი ოკუპირებული რეგიონებიდან უკრაინელი ბავშვების ევაკუაციაში. მათი თქმით, 2022 წლიდან უკრაინიდან 19 500-ზე მეტი ბავშვი იქნა დეპორტირებული, საიდანაც 1 605 დაბრუნდა. ოკუპირებული ტერიტორიებიდან რუსეთში ბავშვების გადაყვანა ჰააგაში ვლადიმერ პუტინისა და რუსეთის ბავშვთა ომბუდსმენის, მარია ლვოვა-ბელოვას დაპატიმრების ორდერის გაცემის საფუძველი გახდა.

საპასუხოდ, რუსეთის ხელისუფლებამ განაცხადა, რომ მათ ბავშვები არ გაუტაციათ, მათი უსაფრთხოების მიზნით ევაკუაცია მოახდინეს.