კოალიცია ძლიერი საქართველო — ლელო ეხმაურება ოცნების პარლამენტის თავმჯდომარის, შალვა პაპუაშვილის მოწოდებას იმის შესახებ, რომ გაემიჯნონ მათი კოალიციის წევრს, ალეკო ელისაშვილს. წინააღმდეგ შემთხვევაში მათ, ასევე პარტია მოქალაქეებსა და ევროპელი ლიბერალების პარტიას (ALDE) მოიხსენიებს, როგორც ტერორისტების მფარველს.

კოალიცია ძლიერი საქართველო გავრცელებულ განცხადებაში წერს, რომ "ალეკო ელისაშვილი არ არის პარტია ძლიერი საქართველო — ლელოს წევრი, შესაბამისად, ვერსაიდან გარიცხავენ. მათივე თქმით, "ალეკო ელისაშვილი წარმოადგენს საკუთარ პარტიას — მოქალაქეებს, რომელიც მისი დაფუძნებულია და მისი პარტია არ გახლავთ ALDE-ს წევრი.

"საკუთარი მოქალაქეების წინააღმდეგ აკრძალული ქიმიური იარაღის სავარაუდო გამოყენებაში ეჭვმიტანილი ოცნების პარლამენტის თავმჯდომარე უკვე რამდენიმე დღეა კოალიცია ძლიერი საქართველო — ლელოს წინააღმდეგ არასერიოზულ განცხადებებს აკეთებს პოლიტიკური გუნდიდან ალეკო ელისაშვილის გარიცხვის თაობაზე.

ძლიერი საქართველო — ლელოს ლიდერებისა და პარტია მოქალაქეების მხრიდან არაერთხელ გაკეთდა განცხადება, რომ ალეკო ელისაშვილი არ არის პარტია ძლიერი საქართველო — ლელოს წევრი, შესაბამისად, ვერსაიდან გავრიცხავთ. ალეკო ელისაშვილი წარმოადგენს საკუთარ პარტიას — მოქალაქეებს, რომელიც მისი დაფუძნებულია და მისი პარტია არ გახლავთ ALDE-ს წევრი.

რაც შეეხება კოალიციას, ის შეიქმნა წინასაარჩევნოდ და ამის შესახებ არაერთხელ განგვიცხადებია. ამ კოალიციურ პარტნიორობას ძლიერი საქართველო — ლელო და პარტია მოქალაქეები დღემდე ვაგრძელებთ.

ალეკო ელისაშვილის ქმედებასთან დაკავშირებით ძლიერ საქართველო — ლელოს ოფიციალური განცხადება გაკეთებული აქვს და შალვა პაპუაშვილს შეუძლია იხელმძღვანელოს ამ პოზიციით. თავად ალეკო ელისაშვილმა სასამართლოზე აღნიშნა, რომ ეს იყო მისი პერსონალური პროტესტი. მიუხედავად ამისა, ქართული ოცნება ცდილობს საკითხის პოლიტიკურ ინსტრუმენტალიზაციას, მორიგი აბსურდული ბრალის შეთხზვას და ძლიერი საქართველო-ლელოსთან და მის ლიდერებთან ამ აბსურდის დაკავშირებას.

ამავდროულად, ჩვენ და ქართული საზოგადოება შალვა პაპუაშვილის მხრიდან ველით, რომ ის გაემიჯნოს ქართული ოცნების ხელისუფლების მიერ ჩადენილ წამების ფაქტებს, რაც გამოიხატა 300-ზე მეტი აქტივისტის სასტიკ და ორგანიზებულ ცემასა და მათ წინააღმდეგ, სავარაუდოდ, ქიმიური იარაღის გამოყენებაში, რაც უკვე შეფასდა "ტერორისტულ აქტად საკუთარი მოქალაქეების წინააღმდეგ," ასევე ის უნდა გაემიჯნოს საქართველოში "არაბული ანკლავების" შექმნისა და სახელმწიფოს ინტერესების დაზიანების ფაქტს, გაემიჯნოს დამნაშავეებს და კორუმპირებულ ჩინოვნიკებს მისივე გუნდის წევრებს შორის და ყველა სხვა კანონდარღვევას, რომელსაც ოცნების რეჟიმი ჩადის," — ნათქვამია განცხადებაში.

• პაპუაშვილი ამბობს, რომ თუ "მოქალაქეები", "ძლიერი საქართველო" და ALDE არ გაემიჯნებიან ალეკო ელისაშვილს, მათ ტერორისტის მფარველებად მოიხსენიებს
• ნინო წილოსანი: ALDE არის ნაცების და ამ ბოროტი ძალის მფარველი დასავლური დედაპარტია
• გრიგოლ გეგელია: "კითხვები ჰქონიათ, როდის გავრიცხავთ ელისაშვილს — არასდროს, ბატონებო"
• ALDE: მოვუწოდებთ პარტნიორებს, შეზღუდონ იმ აღჭურვილობის გადაცემა, რომელიც შეიძლება მშვიდობიანი მოსახლეობის წინააღმდეგ იქნას გამოყენებული