"საქართველოს ისტორიაში უპრეცედენტო რამ მოხდა, ამჯერად უკვე საქართველოს სასამართლო ხელისუფლება პირდაპირ და უკანონოდ ჩაერია პრეზიდენტის კონსტიტუციურ უფლებამოსილებაში", — ასე შეაფასა პრეზიდენტის საპარლამენტო მდივანმა, გიორგი მსხილაძემ საქალაქო სასამართლოს გადაწყვეტილება, რომლის მიხედვით, პრეზიდენტის განკარგულება, იუსტიციის უმაღლესი საბჭოს წევრად კახა წიქარიშვილის დანიშვნის შესახებ, შეჩერებულია.

მსხილაძის თქმით, პრეზიდენტის განკარგულების შეჩერება ხელისუფლების დანაწილების პრინციპის დარღვევაა და ეს არის კიდევ ერთი დასტური სასამართლოს კლანური მმართველობის, რომლისთვისაც "ერთი განსხვავებული აზრიც კი მიუღებელია იუსტიციის უმაღლეს საბჭოში".

"დღეს გაუგონარი რამ ხდება, ეს უკვე ქვეყნის ტრაგედიაა. ყველამ უნდა იცოდეს, რომ არავის აქვს უფლება დემოკრატიულად, ხალხის მიერ არჩეულ სახელმწიფოს მეთაურს წაართვას მისთვის კონსტიტუციურად მინიჭებული უფლებამოსილება", — განაცხადა მსხილაძემ.

პრეზიდენტი, "აღნიშნულ საკითხზე სათანადო რეაგირებისთვის" მიმართავს საზოგადოებას, დიპლომატიურ კორპუსს, საერთაშორისო თანამეგობრობას, საერთაშორისო ორგანიზაციებს, და ეუთო/ოდირს, რომლის წარმომადგენლებიც აკვირდებოდნენ იუსტიციის უმაღლესი საბჭოს წევრის კანდიდატურის შერჩევის პროცესს.

დღეს, 22 ივლისს, თბილისის საქალაქო სასამართლომ განაცხადა, რომ პრეზიდენტის განკარგულება, იუსტიციის უმაღლესი საბჭოს წევრად კახა წიქარიშვილის დანიშვნის შესახებ, შეჩერებულია.

მიზეზი პრეზიდენტის მიმართ საქალაქო სასამართლოს ადმინისტრაციულ საქმეთა კოლეგიაში შესული სარჩელია, რომლის ავტორი, მედიაში გავრცელებული ინფორმაციით, ადვოკატი მანუჩარ კაკოჩაშვილია.