მოკლედ: საქართველოს ახალგაზრდა იურისტთა ასოციაცია (საია), რომელიც ნატა ფერაძის სამართლებრივ უფლებებს იცავს, აცხადებს, რომ მოსამართლე ნინო შჩერბაკოვმა არ განმარტა, რატომ მიიჩნია დანაშაულის პროპორციულ ზომად ნატა ფერაძისთვის 5-დღიანი პატიმრობის შეფარდება და არა — ფულადი ჯარიმა, რასაც ასევე ითვალისწინებს მუხლი.

  • საიას მიხედვით, დაუსაბუთებელი დადგენილებით ყველაზე მკაცრი სანქციის, პატიმრობის გამოყენება დაუშვებელია და ეწინააღმდეგება საქართველოს კონსტიტუციას.
  • ამ გადაწყვეტილებას ისინი დღესვე გაასაჩივრებენ სააპელაციო სასამართლოში.

რა მოხდა: დღეს, 2 თებერვალს ნატა ფერაძე ადმინისტრაციულ სამართალდარღვევათა კოდექსის 1662-ე მუხლით დააკავეს.

  • საგულისხმოა, რომ ეს მუხლი, 5-დღიან პატიმრობასთან ერთად, ასევე ითვალისწინებს პირის დაჯარიმებას 500 ლარის ოდენობით, თუმცა, სასამართლომ ფერაძის დაპატიმრების გადაწყვეტილება მიიღო.

"ფერაძის საქმის" ქრონოლოგია: 6 იანვარს სამების ტაძარში გადაღებული ვიდეო გამოაქვეყნა, სადაც ჩანს რომ მატრონა მოსკოველის ხატზე სტალინია გამოსახული.

  • 7 იანვარს საქართველოს პატრიოტთა ალიანსის წევრმა ირმა ინაშვილმა გამოაქვეყნა ვიდეო და თქვა, რომ სტალინის ხატი სამების საკათედრო ტაძარს "მათ შესწირეს";
  • 9 იანვარს, აქტივისტის, ნატა ფერაძის მიერ ფეისბუქზე გამოქვეყნებულ ვიდეოში ჩანს, რომ სტალინისა და მატრონა მოსკოველის ხატს ლურჯი საღებავი შეასხეს.
  • 10 იანვარს, ნატა ფერაძის სახლთან პრორუსულმა, ძალადობრივმა და ჰომოფობიურმა მოძრაობამ, ალტ-ინფომ აქცია გამართა. ადგილზე მობილიზებული იყო პოლიცია.
  • 11 იანვარს სამების საკათედრო ტაძრიდან სტალინის გამოსახულებიანი ხატის გამოტანის მოთხოვნით პეტიცია შეიქმნა;
  • 2024 წლის 13 იანვარს პრორუსულმა და ძალადობრივმა პარტიამ კონსერვატიულმა მოძრაობამ საქართველოს პარლამენტის წინ აქცია გამართა.
  • ისინი სახელმწიფოსგან მოითხოვდნენ, "მკრეხელობისთვის" დაისაჯოს ფერაძე და პასუხი აგოს სისხლის სამართლის კოდექსის 155-ე მუხლის მიხედვით, რაც 2-წლამდე პატიმრობასაც გულისხმობს.

რეპორტაჟი: ამბორი მატრონა მოსკოველსა და სტალინს