მოკლედ: პატრიოტთა ალიანსის ლიდერი, ირმა ინაშვილი აცხადებს, რომ მატრონა მოსკოველის ხატი, რომელზეც იოსებ სტალინიც არის გამოსახული, სამების საკათედრო ტაძარს "მათ შესწირეს".

  • ინაშვილი ამის შესახებ საუბრობს ვიდეომიმართვაში, რომელიც ფეისბუქით გაავრცელა.

დეტალები: ინაშვილი გაუნათლებელს და ბნელს უწოდებს ყველას, ვინც ეკლესიაში ხატზე სტალინის ნახვამ აღაშფოთა.

ამბობს, რომ ხატებზე ხშირად არიან გამოსახული ჯალათები და ამას "კანონიკა ითვალისწინებს".

"რას ვიზამთ, ასეთი ეპოქაა, სულ თავი უნდა იმართლოს ჩვენნაირმა ხალხმა. უნდა ვიყოთ თავის მართლების რეჟიმში, თურმე და არ ვაპირებთ, არაფერი გვაქვს თავის სამართლებელი.

ჩვენ შევწირეთ ეს ხატი სამების ტაძარს, ძალიან დიდმა პროფესიონალმა, ცნობილმა ხატმწერმა, არაჩვეულებრივმა ადამიანმა დაწერა ეს ხატი, რომელსაც ცოდნაც გააჩნია სათანადო და ცხოვრების წესითაც პასუხობს ხატმწერის კრიტერიუმებს", — თქვა ინაშვილმა.

ბოლო ხაზი: ხატის შესახებ ინფორმაცია ჯერ დეკანოზმა ილია ჭიღლაძემ, შემდეგ კი — პარტია ევროპული საქართველოს წევრმა, გიორგი კანდელაკმა გაავრცელეს.

  • მოგვიანებით, საპატრიარქოს საზოგადოებასთან ურთიერთობის სამსახურის ხელმძღვანელმა, ანდრია ჯაღმაიძემ თქვა, რომ ეს თემა შობის დღესასწაულის სკანდალის გადაფარვის მიზნით წამოიწია.
  • "ამ შემთხვევის შეფასებაზე ერთი დღის შემდეგ შეიძლებოდა გვემსჯელა. დღევანდელი დღე სპეციალურად არის შერჩეული და დაიმახსოვრეთ, ასეთი მცდელობები იქნება სხვა დღესასწაულებზეც", — ამბობს ჯაღმაიძე ტაბულასთან.