ევროპის საბჭოს ადამიანის უფლებათა კომისარი, ნილს მუჟნიეკსი, საქართველოდან გატაცებული ჟურნალისტის, აფგან მუხტარლის საქმეს ეხმიანება და აცხადებს, რომ უმნიშვნელოვანესია ამ ვითარებაში საქართველოს სამართალდამცავი ორგანოების მობილიზება და დამოუკიდებელი, ეფექტიანი გამოძიების ჩატარება:

"შეძრწუნებული ვარ იმით, რაც აფგან მუხტარლის დაემართა. აზერბაიჯანელი ჟურნალისტსა და აქტივისტს, რომელიც, არსებული ინფორმაციით, საქართველოდან გაიტაცეს და აზერბაიჯანში ძალის გამოყენებით წაიყვანეს. მას ახლა საზღვრის უკანონოდ გადაკვეთის ბრალდებით პატიმრობა ემუქრება. მუხტარლი 2015 წლიდან საქართველოში ცხოვრობს. მან აზერბაიჯანი დატოვა, რადგან მთავრობის საქმიანობის კრიტიკულად გაშუქების გამო, რეპრესიები ემუქრებოდა.

მისი ადვოკატის თქმით, მუხტარლის ჯიბეში ფული ჩაუდეს და სცემეს. ეს ძალიან სერიოზული ბრალდებებია, რომლებსაც საქართველოს ხელისუფლება ყურადღებით უნდა მოეკიდოს. საქართველოს ძალოვანი სტრუქტურები ვალდებულნი არიან ეფექტიანი, დამოუკიდებელი და სწრაფი გამოძიება ჩაატარონ განვითარებულ მოვლენებზე და საჭირო ზომები მიიღონ. ამავე დროს, აზერბაიჯანის ხელისუფლებამ სასწრაფოდ უნდა გაათავისუფლოს მუხტარლი და გაუფრთხილდეს მის უფლებებს, მათ შორის, დაიცვას ის წამებისა და მუქარისგან".

აფგან მუხტარლი აზერბაიჯანის ხელისუფლების მიერ დევნილი ჟურნალისტია, რომელიც თავს თბილისს აფარებდა ოჯახთან ერთად. მისი ცოლის, ლეილა მუსტაფაევას თქმით, აფგანი თბილისში, სოლოლაკის ტერიტორიიდან 29 მაისს დაიკარგა, მოგვიანებით კი აღმოჩნდა, რომ ის აზერბაიჯანშია დაპატიმრებული საზღვრის უკანონოდ კვეთის ბრალდებით. მუსტაფაევას აინტერესებს, როგორ გადაკვეთა მუხტარლიმ საქართველო-აზერბაიჯანის საზღვარი მაშინ, როცა მისი პასპორტი თბილისში, სახლში ჰქონდა დატოვებული. თავად მუხტარლიმ აზერბაიჯანში ადვოკატს უთხრა, რომ ის ნაცემია.

საქართველოს შინაგან საქმეთა სამინისტრო ამბობს, რომ მათ გამოძიება ადამიანის თავისუფლების უკანონოდ აღკვეთის მუხლით დაიწყეს, თუმცა, ჯერ არ განუმარტავთ, როგორ აღმოჩნდა თბილისში დაკარგული ჟურნალისტი ბაქოს ციხეში. აფგან მუხტარლი ჯერ კიდევ რამდენიმე დღის წინ ამბობდა, რომ აზერბაიჯანის ხელისუფლების მიერ დევნილ პირებს საქართველოში საფრთხე ემუქრებათ, რადგან მათ თავშესაფარს არ აძლევენ და უკან, აზერბაიჯანში აბრუნებენ, სადაც წამება და მრავალწლიანი პატიმრობა ელოდებათ.

აფგან მუხტარლის აზერბაიჯანის პროკურატურამ სამი ბრალი წაუყენა, სასამართლომ კი ჟურნალისტს სამთვიანი წინასწარი პატიმრობა შეუფარდა.