ინფორმაცია ამის შესახებ უკრაინის გენერალურმა შტაბმა გაავრცელა.

რატომ არის მნიშვნელოვანი: უკრაინის ხელისუფლების ინფორმაციით, ჟურნალისტებმა საომარ ზონაში მუშაობის წესები დაარღვიეს.

  • გენშტაბში არ აკონკრეტებენ, რომელი მედიის წარმომადგენლებს გაუუქმდათ მუშაობის ნებართვა.
  • რუსეთის ჯარის გასვლის შემდეგ ჟურნალისტები გათავისუფლებული ხერსონიდან, ძირითადად, ადგილობრივებისა და უკრაინელი სამხედროების საზეიმო შეხვედრის კადრებს ავრცელებდნენ.

დეტალები: გენშტაბის ინფორმაციით, მედიის წარმომადგენლების პრეს ბარათები აღარ მოქმედებს.

  • "მედიის ზოგიერთმა წარმომადგენელმა უგულებელყო არსებული აკრძალვები და გაფრთხილებები, სტაბილიზაციის ღონისძიებების დასრულებამდეც ახორციელებდა საინფორმაციო აქტივობებს ქალაქ ხერსონში. მსგავსი ქმედებები არის უკრაინის შეიარაღებული ძალების მთავარსარდლის ბრძანების, ასევე სამხედრო სარდლობის შესაბამისი ბრძანებების მოთხოვნების უხეში დარღვევა“, — ნათქვამია განცხადებაში.
  • გამოცემა მედია დეტექტორი, წყაროებზე დაყრდნობით, იუწყება, რომ აკრედიტაცია შეუჩერდა, სულ მცირე, 6 ჟურნალისტს, მათ შორის არიან CNN-ისა და SkyNews-ის კორესპონდენტები.
  • მათივე ინფორმაციით, განთავისუფლების შემდეგ ხერსონში მუშაობდნენ სუსპილნისა და ჰრომადსკეს გადამღები ჯგუფებიც.
  • CNN-ისა და SkyNews-ის ჟურნალისტებისთვის აკრედიტაციის გაუქმების განზრახვის შესახებ მედია დეტექტორს უკრაინის სამხრეთის თავდაცვის ძალების ერთობლივი საკოორდინაციო პრესცენტრის ხელმძღვანელმა, ნატალია გუმენიუკმაც განუცხადა.

მოგვიანებით, უკრაინის ომბუდსმენმა, დმიტრი ლუბინეცმა, თავდაცვის მინისტრს, ალექსეი რეზნიკოვს, მიმართა, მედიასაშუალებებს აკრედიტაცია დაუბრუნონ.

  • "მსოფლიომ უნდა იცოდეს სიმართლე რუსეთის ფედერაციის დანაშაულებებზე და ჟურნალისტებს უნდა შეეძლოთ ამ სიმართლის გავრცელება", — დაწერა ლუბინეცმა.
  • უკრაინის ხელისუფლებას ჟურნალისტებისთვის აკრედიტაციის დაბრუნების მოთხოვნით მედია ორგანიზაციებმაც მიმართეს.