პარლამენტის თავმჯდომარე ამბობს, რომ საქმე "მთავრობის ფორმირებასთან" დაკავშირებით "ულტიმატუმს" ეხება.

რატომ არის მნიშვნელოვანი: 18 აგვისტოს ქართულმა ოცნებამ საარჩევნო კოდექსის გადასინჯვის საკითხზე შექმნილ სამუშაო ჯგუფში ISFED არ მიიწვია.

  • მათი განცხადებით, პროცესში მხოლოდ იმ ორგანიზაციებს შეუძლიათ მონაწილეობის მიღება, რომლებიც "ნეიტრალიტეტს" ინარჩუნებენ;
  • ეს საიას თავმჯდომარემ ერთპარტიულ, დისკრიმინაციულ გადაწყვეტილებად შეაფასა, რომელსაც არაფერი აქვს საერთო დემოკრატიულ პროცესებთან.

დეტალები: პაპუაშვილი სამართლიანი არჩევნების არმიწვევის მეორე მიზეზად იმ "რადიკალურ დღის წესრიგს" ასახელებს, რომელიც მისი თქმით, რამდენიმე არასამთავრობო ორგანიზაციას აქვს.

  • მისი განცხადებით, ეს დროულად უნდა შეფასდეს, რადგან წინააღმდეგ შემთხვევაში ეს მხოლოდ "წაახალისებს რადიკალურ დღის წესრიგს", რაც პაპუაშვილის მტკიცებით, პოლარიზაციის წახალისებას ნიშნავს.

პასუხი NGO-ებს: პარლამენტის თავმჯდომარე ასევე გამოეხმაურა არასამთავრობო ორგანიზაციების გადაწყვეტილებას, რომ ISFED-ის დაშვებამდე "ოცნების" ინიციატივით შექმნილ სამუშაო ჯგუფებში მონაწილეობა არ მიიღონ.

  • "ეს არის არაჯანსაღი სოლიდარობა. ზღვარი სოლიდარობასა და კორპორატივიზმს შორის არის ძალიან ვიწრო და სამწუხაროდ, სწორედ ასეთ დროს ხდება გადალახვა ამ ზღვარის".

საერთაშორისო პარტნიორები: აღნიშნულთან დაკავშირებით განცხადებები გაავრცელეს აშშ-ის საელჩომ და ევროკავშირის წარმომადგენლობამ.

რას ამბობს ISFED: მმართველი პარტიის ამ გადაწყვეტილებას სამართლიანი არჩევნებიც გამოეხმაურა და განაცხადა, რომ ეს ხელისუფლების მხრიდან სამოქალაქო სექტორის წინააღმდეგ დემარშია.

  • ორგანიზაციამ მიუთითა, რომ ევროკავშირის რეკომენდაციების შესასრულებლად, სამუშაო პროცესში სამოქალაქო საზოგადოების ჩართულობა თავად დასავლელი პარტნიორების რეკომენდაცია იყო.