ამერიკის შეერთებული შტატების თავდაცვის მდივნის, ლოიდ ოსტინის განცხადებით, უკრაინა შეძლებს ომის მოგებას, თუ მას შესაბამისი აღჭურვილობა ექნება.

ოსტინი ამბობს, რომ უკრაინაში ბრძოლის ბუნება განვითარდა, ამიტომ მას ტანკები და იარაღი სჭირდება. ის, ასევე, აღნიშნავს, რომ აშშ უჭირს თვალყური ადევნოს, თუ რა ბედი ეწევა უკრაინისთვის გადაცემულ იარაღს, თუმცა ესაუბრა უკრაინელებს, რათა დარწმუნდეს, რომ კარგად კონტროლდება.

"გამარჯვების პირველი ნაბიჯია გჯეროდეს, რომ შეგიძლია გაიმარჯვო... გვჯერა, რომ შეგვიძლია გავიმარჯვოთ. მათ [უკრაინას] შეუძლია გაიმარჯვოს, თუ შესაბამისი აღჭურვილობა და მხარდაჭერა ექნებათ", — განაცხადა მან.

პენტაგონის ხელმძღვანელი დასძენს, რომ ზელენსკი მადლობელია ყველაფრისთვის, რასაც აშშ აკეთებს, თუმცა ის ორიენტირებულია იმაზე, თუ რა სჭირდება უკრაინას შემდგომი წარმატებისთვის.

აშშ-ის სახელმწიფო მდივანი, ენტონი ბლინკენი და თავდაცვის მდივანი ლოიდ ოსტინი უკრაინის პრეზიდენტს ვოლოდიმირ ზელენსკის, თავდაცვის მინისტრს, ალექსეი რეზნიკოვსა და შინაგან საქმეთა მინისტრს, დენის მონატირსკის შეხვდნენ. უსაფრთხოების მიზნებიდან გამომდინარე, აშშ-ის მაღალჩინოსნებისა და ზელენსკის შეხვედრა გასაიდუმლოებული იყო. ის 3 საათის განმავლობაში მიმდინარეობდა.

აშშ-ის მაღალი თანამდებობის პირების ჩასვლაზე კიევში ინფორმაცია გუშინ, 24 აპრილს უკრაინის პრეზიდენტის ადმინისტრაციის უფროსმა მრჩეველმა, ალექსეი არესტოვიჩმა გაავრცელა. ეს რუსეთის უკრაინაში შეჭრის შემდეგ აშშ-ის მაღალჩინოსნების პირველი ვიზიტია კიევში.

ამავე თემაზე:

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში