NATO-ს მინისტერიალის დასრულების შემდეგ გენერალურმა მდივანმა, იენს სტოლტენბერგმა განაცხადა, რომ ალიანსის წევრები შეთანხმდნენ, შეინარჩუნონ და გააძლიერონ უკრაინის მხარდაჭერა. მისი თქმით, მინისტრები ასევე თანხმდებიან პრაქტიკული მხარდაჭერის გაძლიერებაზე რუსეთის აგრესიის საფრთხის წინაშე მყოფი სხვა პარტნიორებისთვის, მათ შორის საქართველოსა და ბოსნია და ჰერცეგოვინასთვის, რათა ხელი შეუწყონ მათ მდგრადობას.

"მოკავშირეები ბევრს აკეთებდნენ. მათ გადაწყვეტილი აქვთ გააკეთონ უფრო მეტი ახლა საშუალო და გრძელვადიან პერსპექტივაში, რათა დაეხმარონ მამაც უკრაინელებს დაიცვან თავიანთი სახლები, ქვეყანა და უკან გააბრუნონ დამპყრობელი ძალები", — თქვა მან.

საქართველოს მხარდაჭერაზე საუბრისას სტოლტენბერგმა აღნიშნა, რომ NATO-საქართველოს მხარდამჭერი პაკეტი მოიცავს ისეთ სფეროებს, როგორებიცაა სიტუაციური ცნობიერება, უსაფრთხო კომუნიკაცია და კიბერუსაფრთხოება.

სტოლტენბერგის თქმით, მინისტრები შეთანხმდნენ, რომ NATO-ს შემდეგი სტრატეგიული კონცეფცია, რომელიც დასრულდება ივნისის მადრიდის სამიტზე, უნდა ითვალისწინებდეს NATO-ს მომავალ ურთიერთობებს რუსეთთან და ჩინეთის მზარდ გავლენას მოკავშირეთა უსაფრთხოებაზე.