რუსეთის უშიშროების საბჭოს მდივნის მოადგილემ, დიმიტრი მედვედევმა რუსეთისთვის ევროსაბჭოში წარმომადგენლობის უფლების შეჩერება შეაფასა როგორც "ქვეყანაში განსაკუთრებით მძიმე დანაშაულების პრევენციისთვის რიგი მნიშვნელოვანი ინსტიტუტების აღდგენის კარგი შესაძლებლობა". ამის შესახებ მან რუსულ სოციალურ მედიაში, Vkontake-ში თავის გვერდზე დაწერა.

"ეს წარმოუდგენელი უსამართლობაა. თუმცა იმის მშვენიერი შესაძლებლობაცაა, რომ, საბოლოოდ, გამოვიჯახუნოთ კარი და დავივიწყოთ ეს უაზრო დავრდომილთა თავშესაფრები. თავის დროზეც რომ შევუერთდით, სისულელით მოგვივიდა. ახალგაზრდობით. ამასთან, ეს იმისთვისაც კარგი შესაძლებლობაა, რომ ქვეყანაში განსაკუთრებით მძიმე დანაშაულების პრევენციისთვის რიგი მნიშვნელოვანი ინსტიტუტები აღვადგინოთ. მაგალითად, ყველაზე საშიში დამნაშავეების სიკვდილით დასჯა, რაც, სხვათა შორის, აშშ-სა და ჩინეთში აქტიურად გამოიყენება".

ამასთან, მედვედევმა მიმდინარე მოვლენები 2008 წლის ომს შეადარა: "ეს სასწაულებრივი აკრძალვები არაფერს შეცვლიან. მათ შორის, არც დონბასის დასაცავად საომარი ოპერაციის ჩატარების შესახებ მიღებულ გადაწყვეტილებას. ის მთელი მასშტაბით წარიმართება ყველა იმ შედეგის მიღწევამდე, რომლებზეც რუსეთის პრეზიდენტმა ისაუბრა. არც მეტი არც ნაკლები. როგორც ეს, სხვათა შორის, 2008 წლის მსგავსი სიტუაციისას იყო".

ევროსაბჭოში რუსეთს წარმომადგენლობის უფლება 25 თებერვალს შეუჩერეს, თუმცა ის კვლავ რჩება წევრად. ევროსაბჭოს განცხადებით, ეს არა საბოლოო, არამედ დროებითი ღონისძიებაა. რუსეთისთვის წევრობის სტატუსის შეჩერების ინიციატივა პოლონეთსა და უკრაინას ეკუთვნოდათ.

24 თებერვალს პუტინმა უკრაინაში ომი დაიწყო. კრემლში ამტკიცებენ, თითქოს მშვიდობიან მოსახლეობას თავს არ ესხმიან, რაც ტყუილია — იბომბება დასახლებები, ბაღები, სკოლები, საავადმყოფოები. რუსეთმა უკრაინას სხვადასხვა ტერიტორიიდან შეუტია და ახლა საომარი მოქმედებები ქვეყნის არაერთ რეგიონსა და ქალაქში მიმდინარეობს, მათ შორის, კიევის ოლქთან.

ორივე მხარეს არის დანაკარგები — დაიღუპა ასეულობით მშვიდობიანი მოქალაქე და სამხედრო პირი. რუსული ჯარები ცდილობენ ხელში ჩაიგდონ მნიშვნელოვანი ობიექტები, უკრაინა მათ წინააღმდეგობას უწევს. სამხედრო მოქმედებებს თან ახლავს კიბერშეტევები, დეზინფორმაციისა და პროპაგანდის ტალღა.

ვოლოდიმირ ზელენსკიმ ქვეყანაში ჯერ სამხედრო მდგომარეობა, შემდეგ კი საყოველთაო მობილიზაცია გამოაცხადა და თქვა, რომ იარაღს მისცემენ ყველას, ვისაც ქვეყნის დაცვა ენდომება. ზელენსკიმ არაერთხელ მოუწოდა პარტნიორებს დახმარებისა და სერიოზული ნაბიჯების გადადგმისკენ და აღნიშნა, რომ ომი არამხოლოდ უკრაინაში, არამედ ევროპაშია.

ევროკავშირმა, აშშ-მ, დიდმა ბრიტანეთმა, კანადამ, იაპონიამ, ავსტრალიამ, სამხრეთ კორეამ, ტაივანმა, ახალმა ზელანდიამ, გერმანიამ რუსეთს სანქციები დაუწესეს, რომელიც მოიცავს ფინანსურ შეზღუდვებს ფიზიკურ და იურიდიულ პირებზე, რუსულ ელიტაზე, ოლიგარქებზე, მსხვილ ბანკებზე, ავიაკომპანიებზე. უკრაინა უფრო ეფექტური ნაბიჯების გადადგმას ითხოვს. აშშ-მ დაასანქცირა ვლადიმერ პუტინი და სერგეი ლავროვიც.

დამატებითი ინფორმაცია უკრაინაში მიმდინარე მოვლენებზე განახლებად რეჟიმში შეგიძლიათ ნახოთ აქ:

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში