პარტია გახარია საქართველოსთვის ერთ-ერთი ლიდერი, ნათია მეზვრიშვილი ოცნების ხელისუფლებაში განხორციელებულ საკადრო ცვლილებებსა და ირაკლი კობახიძის გადაწყვეტილებას ეხმაურება იმის შესახებ, რომ მთავრობის ეფექტიანობის დეპარტამენტი იქმნება.

ნათია მეზვრიშვილის თქმით, დღეს გამოცხადებული საკადრო ცვლილებები პირდაპირ კავშირშია მთავრობის ეფექტიანობის დეპარტამენტის შექმნასთან.

"ოცნების ამ გადაწყვეტილებასთან პირდაპირ კავშირშია ასევე ორი დღის წინ დაანონსებული თითქოსდა მთავრობის ეფექტიანობის დეპარტამენტის შექმნა, რომლის მიზანი კორუფციის ცენტრალიზებაა და არა ეფექტიანობის უზრუნველყოფა ან კორუფციის წინააღმდეგ ბრძოლა. მთავრობის ადმინისტრაციაში გვქონდა შიდა აუდიტის დეპარტამენტი, რომელიც გენერალური ინსპექციის ფუნქციას ასრულებდა ადმინისტრაციის მასშტაბით. ეს დეპარტამენტი გადაკეთება ე.წ. მთავრობის ეფექტიანობის დეპარტამენტად. ამ ნაბიჯით ივანიშვილი ახდენს კორუფციული გარიგებების (როგორც მისი ძალაუფლების წყაროს) სრულ მონოპოლიზებას", — წერს ნათია მეზვრიშვილი.

დღეს გამართულ ბრიფინგზე ოცნების პრემიერმა, ირაკლი კობახიძემ ოცნების ხელისუფლებაში დაგეგმილ საკადრო ცვლილებებზე ისაუბრა.

"ოცნების" ხელისუფლებაში საკადრო ცვლილებებია — ვინ ვის ცვლის?

მისი თქმით, დამოუკიდებელ სამინისტროდ ჩამოყალიბდება რეგიონული განვითარების სამინისტრო და მას სახელმწიფო უსაფრთხოების სამსახურის უკვე ყოფილი უფროსი, გრიგოლ ლილუაშვილი უხელმძღვანელებს;

ინფრასტრუქტურის მინისტრად დარჩება ირაკლი ქარსელაძე;

სახელმწიფო უსაფრთხოების სამსახურის უფროსად კი ამჟამინდელი იუსტიციის მინისტრი ანრი ოხანაშვილი წარადგინა, იუსტიციის მინისტრის პოსტზე კი — "ოცნების" პარლამენტის წევრი, ადვოკატი პაატა სალია.

31 მარტს გამართულ ბრიფინგზე ოცნების ლიდერმა, მამუკა მდინარაძემ განაცხადა, რომ ირაკლი კობახიძის გადაწყვეტილებით მთავრობის ეფექტიანობის დეპარტამენტი შეიქმნება, რომელიც “გააკონტროლებს სამინისტროების, სსიპ-ების აიპ-ების და აღმასრულებელი ხელისუფლების სხვადასხვა რგოლის გადაწყვეტილებათა შესრულების ეფექტიანობას”.