პარტია ფედერალისტების ერთ-ერთი ლიდერი, თამარ ჩერგოლეიშვილი იმ პარტიების ჩამონათვალს აქვეყნებს, რომლებიც საქართველოს მე-5 პრეზიდენტის, სალომე ზურაბიშვილის მიერ დაანონსებულ "წინააღმდეგობის კომიტეტს" უერთდებიან.

ამ ჩამონათვალში მოხვდნენ: ფედერალისტები, გახარია საქართველოსთვის, ლელო, დროა, თავისუფლების მოედანი, ევროპული საქართველო, სტრატეგია აღმაშენებელი.

ამ ჩამონათვალის მიხედვით, "წინააღმდეგობის კომიტეტის"“ ფორმატში არ მონაწილეობენ ნაციონალური მოძრაობა და კოალიცია ცვლილებიდან ნიკა გვარამიასა და ზურაბ გირჩი ჯაფარიძის პარტიები.

შეგახსენებთ, რომ გუშინ, 31 მარტს რუსთაველის გამზირზე სიტყვით გამოსვლისას ზურაბიშვილმა თქვა, რომ "ამ პლატფორმის მთავარი პრინციპი ისაა, რომ იგი ღიაა ყველა პროევროპული პარტიისა და ჯგუფისთვის, რომლებიც მზად არიან გვერდზე გადადონ პოლიტიკური შეუთავსებლობები და გაიზიარონ პროტესტის ორი მთავარი მიზანი: დაინიშნოს სამართლიანი ახალი არჩევნები და გათავისუფლდნენ სინდისის პატიმრები".

"დღეს თქვენ წინაშე საჯაროდ ვაცხადებ, რომ შეიქმნას პროევროპული სპექტრის მონაწილეობით წინააღმდეგობის პლატფორმა. ამ პლატფორმის მთავარი პრინციპი ისაა, რომ იგი ღიაა ყველა პროევროპული პარტიისა და ჯგუფისთვის, რომლებიც მზად არიან გვერდზე გადადონ პოლიტიკური შეუთავსებლობები და გაიზიარონ პროტესტის ორი მთავარი მიზანი: დაინიშნოს სამართლიანი ახალი არჩევნები და გათავისუფლდნენ სინდისის პატიმრები.

ამ მიზნების მისაღწევად წინააღმდეგობის პლატფორმა თანხმდება, რომ შეაჯეროს პოლიტიკური პოზიციები რათა კოორდინირებულად, უფრო ეფექტურად ამხილოს და დაუპირისპირდეს რეჟიმს და მის ქმედებებს წინააღმდეგობა გაუწიოს და წინ აღუდგეს რეჟიმის მცდელობას, გაანადგუროს საქართველოს განვითარების ყველა პერსპექტივა და ევროპული მომავალი.

პრეზიდენტის ეგიდით შეიკრიბებიან პლატფორმის სუბიექტები, შეაფასებენ პოლიტიკურ გამოწვევებს, შეაჯერებენ პოზიციებს და შესაძლო ქმედებებს. ამის შესახებ საზოგადოება სრულად და მყისიერად იქნება ინფორმირებული და მჭიდრო კოორდინაცია იქნება პროტესტის ჯგუფებთან, რათა ერთობლივი სტრატეგია იყოს მიღწეული.

წინააღმდეგობის პლატფორმაში მონაწილე პარტიები თანხმდებიან, ახალ არჩევნებში მონაწილეობასა და ხმების ეფექტურად დაცვის მექანიზმზე. მიუხედავად იმისა, როდის დაინიშნება არჩევნები, მმართველმა პარტიამ ვერ უნდა შეძლოს გაატაროს თავისი ინტერესი და გაყალბების შესაძლებლობა ამით შეინარჩუნოს", — თქვა ზურაბიშვილმა.