უკრაინის პრეზიდენტმა, ვოლოდიმირ ზელენსკიმ მსოფლიო ლიდერებს კიდევ ერთხელ მოუწოდა და შეახსენა, რომ თუ დღეს ისინი უკრაინას არ დაეხმარებიან, ხვალ ომი მათ კარზე დააკაკუნებს.

"თუ თქვენ, ძვირფასო ევროპელებო, მსოფლიო ლიდერებო, თავისუფალი სამყაროს ლიდერებო, დღეს არ დაგვეხმარებით, თუ ძლიერად არ დაგვეხმარებით, ხვალ ომი თქვენს კარზე დააკაკუნებს", — განაცხადა მან.

ზელენსკის თქმით, დღეს ძალიან ბევრ მსოფლიო ლიდერს ესაუბრა, თუმცა გადაწყვიტა, მათთვის კიდევ ერთხელ მიემართა. ის აღნიშნავს, რომ უკრაინას ომის გზა არ აურჩევია და მშვიდობას უნდა დაუბრუნდეს.

პუტინმა უკრაინაში ომი დაიწყო, რომელსაც თავად სპეციალურ "სამხედრო ოპერაციას" უწოდებს. უკრაინული მედიისა და სახელმწიფო სტრუქტურების ინფორმაციით, თავდასხმები ხორციელდება არაერთ ქალაქში და იბომბება დასახლებული პუნქტები, მათ შორის კიევში. უკრაინის პრეზიდენტმა, ვოლოდიმირ ზელენსკიმ სამხედრო მდგომარეობა გამოაცხადა და მოუწოდა ხალხს, არ აჰყვნენ პანიკას.

სიტუაცია მუდმივად იცვლება. ზელენსკი ამბობს, რომ რუსული საოკუპაციო ძალები ჩერნობილის ატომური ელექტროსადგურის რადიაციულ ზონაში შევიდნენ. იზრდება დაღუპულთა რიცხვიც — ხერსონის ოლქში დაბომბვის შედეგად დაიღუპა 13 ადამიანი, მათ შორის 2 ბავშვი და 9 სამხედრო მოსამსახურე. კიევთან ახლოს რუსეთის თავდასხმას კი 7 ადამიანი ემსხვერპლა.

გარდა ამისა, CNN ადგილზე მყოფ ჟურნალისტზე დაყრდნობით წერს, რომ რუსულმა საჰაერო-სადესანტო ძალებმა კიევთან ახლოს მდებარე ანტონოვის აეროპორტზე კონტროლი აიღეს.

გაიგეთ მეტი: