ორი დღის წინ მეთიუ მაკკონაჰი და ვუდი ჰარელსონი ტეხასის კაპიტოლიუმში Senate Bill 22-ის მხარდასაჭერად გამოჩნდნენ. კანონპროექტი მიზნად ისახავს 500 მილიონი დოლარის გამოყოფას ყოველ ორ წელიწადში, რათა ტეხასის კინოინდუსტრია უფრო კონკურენტუნარიანი გახდეს და კინოპროდუქციები ისეთ შტატებში არ გადავიდეს, როგორიცაა ჯორჯია და ნიუ-მექსიკო.

"ჩემი 33-წლიანი კარიერის განმავლობაში ერთადერთ რამეზე მწყდება გული, რომ ტეხასში ვერ გადავიღე უფრო მეტი ფილმი", თქვა მაკკონაჰიმ.

ვუდი ჰარელსონი და მეთიუ მაკკონაჰი

ვუდი ჰარელსონი და მეთიუ მაკკონაჰი

ფოტო: Austin American-Statesman

ოსკაროსანმა მსახიობმა ხაზი გაუსვა ინიციატივის ეკონომიკურ სარგებელს და აღნიშნა, რომ ფილმები და სერიალები ადგილობრივ ბიზნესს მნიშვნელოვან შემოსავალს მოუტანს. "ჩვენ ორივემ ჩვენი ჰონორარის 15% დავაბრუნეთ ახალი სერიალის წარმოებისთვის, რომ ამ სერიალის გადაღება ტეხასში მოგვეხერხებინა და არა მაგალითად ჯორჯიაში", თქვა მაკკოჰანიმ.

კანონპროექტი სენატის კომიტეტმა ერთხმად დაამტკიცა და ახლა ის საბოლოო კენჭისყრაზე ტეხასის საკანონმდებლო ორგანოს გადაეცემა.