უკრაინის პრეზიდენტი, ვოლოდიმირ ზელენსკი აცხადებს, რომ უკრაინაში შეჭრით რუსეთმა მთელ დემორკატიულ სამყაროსთან დაიწყო ომი.

"მნიშვნელოვანია სიმართლის ოფიციალური წყაროებიდან მიღება. დღეს რუსეთი უკრაინაში შეიჭრა. პუტინმა უკრაინასთან და მთელ დემოკრატიულ სამყაროსთან დაიწყო ომი. მას ჩემი სახელმწიფოს განადგურება სურს. მას სურს გაანადგუროს ჩვენი სახელმწიფო და ყველაფერი, რაც ავაშენეთ რისთვისაც ვცხოვრობთ", — აცხადებს უკრაინის პრეზიდენტი ფეისბუქგვერდზე გავრცელებულ ვიდეომიმართვაში.

ზელენსკიმ მიმართა უკრაინელ ხალხს, პირველ რიგში სამხედროებს და თქვა, რომ მისთვის ცნობილია მათი სრული ძალა.

"ვიცით უკრაინის შეიარაღებული ძალების ძალა, თქვენ მამაცები ხართ, თქვენ დაუმარცხებლები ხართ, თქვენ უკრაინელები ხართ", — თქვა პრეზიდენტმა.

ამასთან, ზელენსკიმ მოსახლეობას მოუწოდა, პანიკაში არ ჩავარდნენ და უკრაინის შეიარაღებული ძალების მხარდასაჭერად ყველაფერი გააკეთონ.

უკრაინის პრეზიდენტმა საზღვარგარეთ მყოფ უკრაინელებს მიმართა და თქვა, რომ ახლა მათი დახმარება სჭირდებათ.

"მოვუწოდებ ყველა უკრაინელს, რომელიც ახლა საზღვარგარეთაა, ჩვენ გვჭირდება თქვენი მხარდაჭერა. თქვენ დიდი ძალა ხართ. თქვენ შეკრული ძალა ხართ და დაამტკიცეთ ეს. ახლა ძალიან გვჭირდებით", — თქვა მან.

პუტინმა უკრაინაში ომი დაიწყო, რომელსაც თავად სპეციალურ "სამხედრო ოპერაციას" უწოდებს და მიზეზად ოკუპირებული დონეცკისა და ლუგანსკის სეპარატისტი ლიდერების "დახმარების თხოვნას" ასახელებს. ის ამტკიცებს, თითქოს ეს "ოპერაცია" არის თავდაცვა მათგან, ვინც "უკრაინა ტყვედ აიყვანა". ტრადიციულ პროპაგანდისტულ მოტივებზე პუტინი იმეორებს, რომ არ აპირებს უკრაინის ოკუპაციას და უკრაინელი ხალხის თვითგამორკვევის უფლებას უჭერს მხარს.

უკრაინის შინაგან საქმეთა მინისტრის მრჩეველის, ანტონ გონჩარენკოს განცხადებით, განხორციელდა სარაკეტო დარტყმები სამხედრო ადმინისტრაციის ცენტრებზე, აეროდრომებზე, სამხედრო საცავებზე, კიევთან, ხარკოვთან, დნეპერთან. მისივე თქმით, ხდება საზღვრის საარტილერიო დაბომბვა.

უკრაინის საგარეო საქმეთა მინისტრი, დმიტრი კულება აცხადებს, რომ რუსეთმა მათ წიანააღმდეგ სრულმასშტაბიანი ომი დაიწყო და მშვიდობიან ქალაქები იბომბება. მისი თქმით, უკრაინა თავს დაიცავს და მსოფლიომ პუტინი ახლავე უნდა შეაჩეროს.

უკრაინის პრეზიდენტმა, ვოლოდიმირ ზელენსკიმ სამხედრო მდგომარეობა გამოაცხადა. მან მოუწოდა ხალხს, არ აყვნენ პანიკას. მისი თქმით, ყველაფრისთვის მზად არიან და ყველას დაამარცხებენ.

ამავე თემაზე:

გაიგეთ მეტი: