საზოგადოებრივი მაუწყებლის ეთერში განათლების მისნიტრმა გივი მიქანაძემ სასკოლო ფორმების ხარისხსზე ისაუბრა. მისი თქმით, "პოლიესტერზე იყო გამახვილებული ყურადღება, თუმცა ეს მთლიანად პოლიესტერი არაა, იქ არის გარკვეული კონცენტრაციები ბუნებრივ მასალებთან ერთად, რომელიც ფორმის ცვეთადობას ამცირებს".

"ეს არის ანტიალერგიული ქსოვილი და მინდა პირდაპირ გითხრათ, რომ პოლიესტერზე იყო გამახვილებული ყურადღება და საერთაშორისო პრაქტიკაშიც პოლიესტერი აქტიურად გამოიყენება, თუმცა ეს მთლიანად პოლიესტერი არ არის, იქ არის გარკვეული კონცენტრაციები სხვადასხვა ბუნებრივ მასალებთან ერთად და ეს არის იმ სტანდარტის შესაბამისი, რაც საერთო პრაქტიკაში არის დამკვიდრებული, რომელიც უნარჩუნებს ფორმას მოქნილობას, მის ცვეთადობას ამცირებს და რაც მთავარია, ყველა ფორმას – ეს იქნება პიჯაკი, ეს იქნება შარვალი, ეს იქნება ქვედაბოლო – აქვს სარჩული, ის არის ანტიალერგიული და ზუსტად დღეს თქვენთან ეთერში მოსვლამდე მე მქონდა შეხვედრა კომპანიასთან, რომელმაც უკვე პირველი ნიმუშები წარმოადგინა. ამ ნიმუშებს აქვს უკვე საერთაშორისო ხარისხის შესაბამისი ტესტირება ჩატარებული და ეს დასკვნები ითარგმნება უახლოეს დღეებში, თუმცა, რა თქმა უნდა, ხელშეკრულების მოთხოვნაა, რომ საქართველოში მოხდეს მისი ხარისხის შემოწმება და შესაბამისად, ეს ნიმუშები უკვე წარდგენილი იქნება ხარისხობრივ კონტექსტში და დარწმუნებულები ვართ, იმიტომ, რომ თვითონ ვიზუალშიც, ხარისხობრივადაც და როდესაც ვნახეთ და ეს გადაწყვეტილება ფორმა როგორი იქნებოდა, შემცველობა როგორი იქნებოდა, ერთ კონკრეტულ პირს არ მიუღია, ამაზე კომისიამ იმუშავა, სადაც ჩვენ გვყავდა საქართველოს ტექნიკური უნივერსიტეტიდან შესაბამისი დარგის ექსპერტი მოწვეული", — განაცხადა მიქანაძემ.

მისივე თქმით, 30-მდე ქალაქსა და მუნიციპალიტეტში მოეწყო მშობლებთან შეხვედრები და მათი დამოკიდებულება სასკოლო ფორმების მიმართ მხოლოდ და მხოლოდ პოზიტიური იყო. მიქანაძე ამბობს, რომ "საზოგადოება მიესალმება ამ ინიციატივას".

"სამი თვის წინ დავიწყე ასეთი პროექტი — მინისტრის შეხვედრა მშობლებთან და დაახლოებით 30-მდე ქალაქსა და მუნიციპალიტეტში ვიყავი ამ სამი თვის განმავლობაში, სადაც, მინდა გითხრათ, რომ საშუალოდ თითო შეხვედრას 300 მშობელი ესწრებოდა. ...ამ შეხვედრების ფორმატში მე არ მახსენდება ერთი ადამიანიც კი, რომელსაც მხოლოდ და მხოლოდ პოზიტიურად არ გამოეხატოს ის, რომ რა კარგია, რომ ფორმები შემოდის სკოლაში და ეს აქამდეც უნდა გაკეთებულიყო და ეს ასეთი მნიშვნელოვანია. ყოველთვის იყო წუხილი იმისი, რომ რატომ მხოლოდ პირველი და მეექვსე კლასი და რატომ არა ზედა კლასები და ამის შესახებ ჩვენ ძალიან მარტივი ახსნა ვუთხარით საზოგადოებას, რომ პირველიდან მეექვსე კლასში ვიწყებთ და იმიტომ, რომ ფორმის კულტურა საჯარო სკოლებში, გამონაკლისების გარდა, სადაც ნებაყოფლობით შემოიღეს, სულ რამდენიმე სკოლაა ასეთი მთელი ქვეყნის მასშტაბით – საჯარო სკოლებზე მაქვს საუბარი – ბავშვებისთვის ეს არის რაღაცა სიახლე და ამიტომ ჩვენ გვინდა, რომ ეს ეტაპობრივად შემოვიტანოთ, ისინი შევაგუოთ იმ კულტურას, რასაც ფორმის კულტურა ჰქვია და ამიტომ წელს თუ პირველიდან მეექვსე კლასი გვეყოლება, ყოველ წელიწადს თითო კლასი დაემატება. იმიტომ, რომ მეექვსეკლასელი, რომელიც წელს ფორმას ჩაიცვამს, ის უკვე შეჩვეულია ამ ფორმას და უკვე მეშვიდე კლასს დავამატებთ ერთი წლის შემდეგ და აი ესე ეტაპობრივად, თითო წელს გავზრდით იმისთვის, რომ შემდგომში ყველა საფეხური სასკოლო მოვიცვათ ფორმით რამდენიმე წელიწადში და მინდა გითხრათ, რომ საზოგადოება მიესალმება ამ ინიციატივას. ამასთანავე, ჩვენ სრული პასუხისმგებლობით შეგვიძლია გითხრათ, რომ ფორმა იქნება უმაღლესი ხარისხის", — განაცხადა მიქანაძემ.

მისივე თქმით, სასკოლო ფორმების ფასი იქნება რამდენჯერმე იაფი, კერძო სკოლების ფორმებთან შედარებით და ყველა ის ოჯახი, რომელიც ჯანდაცვის სამინისტროს მიერ შეფასებულია 65 000 ან უფრო ნაკლები ქულით, ერთ პიჯაკს და ორ შარვალს ბიჭის შემთხვევაში და ერთ პიჯაკს, ერთ შარვალს და ერთ ქვედაბოლოს გოგონას შემთხვევაში მიიღებს სრულიად უსასყიდლოდ.

2026-2027 სასწავლო წლიდან დაწყებითი საფეხურის მოსწავლეებისთვის სასკოლო ფორმის ტარება სავალდებულო ხდება. 1 801 000 სასკოლო ფორმა 3 ეტაპად შეიკერება.