სომხეთში, ამბერდის ციხესიმაგრეში, არქეოლოგებმა საქართველოსა და კავკასიის ერთ-ერთი ყველაზე გავლენიანი მმართველის — თამარ მეფის — იშვიათი მონეტა აღმოაჩინეს. ამასთანავე, მათ მიაგნეს ადამიანის ჩონჩხსა და არტეფაქტებს, რომლებიც შუა საუკუნეების ყოველდღიურ ცხოვრებას უკეთ გვაცნობს.

როგორც ცნობილია, ეს ყველაფერი არქეოლოგებმა ამბერდის ციხესიმაგრის ნაკრძალში მიმდინარე სარესტავრაციო და გათხრითი სამუშაოების დროს აღმოაჩინეს. სამუშაოების ყველაზე მნიშვნელოვან მიგნებებს შორის თამარ მეფის გამოსახულებიანი მონეტაცაა. ეს აღმოჩენა კიდევ ერთხელ ადასტურებს, თუ რამდენად ძლიერი და ურთიერთდაკავშირებული ისტორია აქვს სამხრეთ კავკასიას.

ფოტო: Armenian Report

გათხრების შედეგად, ციხესიმაგრის შიდა თავდაცვითი კედლის სიახლოვეს, ასევე აღმოაჩინეს ახალგაზრდა ადამიანის ნეშტი. არქეოლოგების განცხადებით, ჩონჩხის თითქმის 90% პირვანდელი სახითაა შემონახული და მხოლოდ თითის ძვლები აკლია. კბილების მდგომარეობაზე დაყრდნობით, ექსპერტები ვარაუდობენ, რომ ინდივიდი გარდაცვალების მომენტში ახალგაზრდა იყო.

გარდა ამისა, მკვლევრებმა შუა საუკუნეების შაშის მსგავსი სამაგიდო თამაშის, თამას ფიგურებიც აღმოაჩინეს. ეს არტეფაქტები ციხესიმაგრის მაცხოვრებლების გართობის გზებზე მიგვანიშნებს.

ამბერდში არქეოლოგიური სამუშაოები კვლავ გრძელდება. მკვლევრები განაგრძობენ ისეთი არტეფაქტების აღმოჩენას, რომლებიც სომხეთისა და ზოგადად კავკასიის ისტორიის აღდგენაში გვეხმარება.