მას შემდეგ, რაც რუსეთის პრეზიდენტმა, ვლადიმერ პუტინმა დონეცკი და ლუგანსკი "დამოუკიდებლად" აღიარა ამერიკის შეერთებული შტატების სახელმწიფო მდივანმა, ენტონი ბლინკენმა რუსეთის საგარეოს საქმეთა მინისტრთან, სერგეი ლავროვთან მიმდინარე კვირას, ჟენევაში დაგეგმილი შეხვედრა გააუქმა.

მისი განცხადებით, ეს უკანასკნელი ნიშანია იმისა, რომ რუსეთთან დიპლომატიური გზები სწრაფად იხურება. ბლინკენის თქმით, რუსეთმა დიპლომატია უარყო.

"ახლა, როდესაც ჩვენ ვხედავთ, რომ უკრაინაში შეჭრა იწყება, რუსეთმა ნათლად აჩვენა, რომ დიპლომატიას სრულად უარყოფს. ამ ეტაპზე, შეხვედრის გაგრძელებას აზრი არ აქვს. მე კონსულტაციები გავმართე ჩვენს მოკავშირეებთან და პარტნიორებთან და ამაზე ყველა თანხმდება", — განაცხადა მან.

ამერიკის შეერთებული შტატების სახელმწიფო მდივანმა, ენტონი ბლინკენმა რუსეთის საგარეო საქმეთა მინისტრის, სერგეი ლავროვის მიწვევა იმ პირობით მიიღო, რომ რუსეთი უკრაინაში არ შეიჭრებოდა.

რუსეთის პრეზიდენტმა, ვლადიმერ პუტინმა უკრაინის ოკუპირებული ტერიტორიები თვითგამოცხადებული ლუგანსკი და დონეცკი "დამოუკიდებელ რესპუბლიკებად" აღიარა. პუტინმა ეს გადწყვეტილება უკრაინის "აგრესიით" ახსნა და გასამართლებლად არაერთი პროპაგანდისტული მესიჯი გააჟღერა. მან უკრაინის ხელისუფლებას მოუწოდა, "დროულად შეწყვიტონ სამხედრო ქმედებები", წინააღმდეგ შემთხვევაში კი "ნებისმიერ სისხლისღვრაზე" პასუხისმგებლობა მათ დააკისრა.

პუტინის გადწყვეტილება მინსკის შეთანხმების უხეში დარღვევაა, რასაც უკვე გამოეხმაურნენ მსოფლიო ლიდერები. ეს ქმედება დაგმო საქართველომაც.

აღიარების შემდეგ პუტინმა უკრაინის ტერიტორიაზე ჯარები გაგზავნა, მოტივად კი ისევ "სამშვიდობო მისია" დაასახელა. პუტინი ბრძანებაში ამტკიცებს, თითქოს უკრაინის ორი რეგიონის "დამოუკიდებლობა" კონფლიქტის მშვიდობიანი რეგულირებისა და მინსკის შეთანხმების გათვალისწინებით აღიარა.

დოკუმენტში ასევე ვკითხულობთ, რომ რუსეთს საგარეო საქმეთა სამინისტროს დაევალა, დონეცკისა და ლუგანსკის "მთავრობებთან" მოამზადოს მეგობრობის და ორმხრივი ურთიერთობების შეთანხმება. პუტინის ბრძანების მიხედვით, დონეცკისა და ლუგანსკის "მმართველების" მიმართვის საფუძველზე, შეთანხმების დადებამდე "სამშვიდობო მისიით" გააგზავნიან ჯარებს.