ცხარე დებატების შემდეგ, დანიაში დაახლოებით 4 მეტრის სიმაღლის "დიდი ქალთევზას" ქანდაკებას, რომელიც წლებია კრიტიკის ობიექტია მისი "გადაჭარბებული ფორმებისა" და დიდი მკერდის გამო, მალე მოხსნიან, იუწყება ადგილობრივი მედია. ქანდაკებას ზოგი "მახინჯსა" და "პორნოგრაფიულს" ეძახის, ხოლო დანიელმა ჟურნალისტმა სორინე გოტფრედსენმა მას "მამაკაცის სექსუალური ფანტაზია — როგორი უნდა იყოს ქალი" უწოდა.

დიდი ქალთევზას ქანდაკება

დიდი ქალთევზას ქანდაკება

ქანდაკება თავდაპირველად 2006 წელს კოპენჰაგენში, ცნობილი "პატარა ქალთევზას" ქანდაკებიდან რამდენიმე ასეული მეტრის მოშორებით დაამონტაჟეს. მისი პროვოკაციული ფორმები თავიდანვე იწვევდა კრიტიკას. 2018 წელს იგი ქალაქის სამხრეთით, დრაგერის ციხესიმაგრეში გადაიტანეს, მაგრამ ახლა დანიიის სასახლეთა და კულტურის სააგენტო გეგმავს მისი სრულად აღებას, რადგან ფიგურა "არ შეესაბამება" ციხესიმაგრის, როგორც 1910 წლიდან არსებული ისტორიული ობიექტის, კულტურულ მემკვიდრეობას.

გამოცემა Politiken-ის ხელოვნების კრიტიკოსმა, მატიას კრიუგერმა, ქანდაკებას "მახინჯი და პორნოგრაფიული"უწოდა, ხოლო გოტფრედსენმა Berlingske-ში აღნიშნა, რომ ასეთი გამოსახულება "ქალების საკუთარ სხეულთან მიღების შეგრძნებას ვერ შეუწყობს ხელს". Berlingske-ის დებატების რედაქტორმა, ამინატა კორ ტრეინმა კი ეს კრიტიკა ბოდი-შეიმინგს შეადარა და იკითხა: "ქალის მკერდი აუცილებლად განსაზღვრული ფორმისა და ზომის უნდა იყოს, რომ საზოგადოებაში გამოჩნდეს?"

ქანდაკების ავტორი, პიტერ ბეკი, თავის ნამუშევარს იცავს და ამბობს, რომ ქალთევზას მკერდი "პროპორციულია".

პიტერ ბეკი თავის ნამუშევართან ერთად

პიტერ ბეკი თავის ნამუშევართან ერთად

ფოტო: Tim Panduro / Dragoer Nyt

"სავსებით ნორმალური პროპორციებია მისი ზომისთვის. ცხადია, დიდი ქალის მკერდიც დიდი იქნება", — უთხრა მან ტელეკომპანია TV 2 Kosmopol-ს. მისი თქმით, ქანდაკება ტურისტებს იზიდავს და კრიტიკა "სრული სისულელეა". ბეკმა ასევე შესთავაზა ქანდაკების დონაცია ციხესიმაგრეს, მაგრამ დრაგერის მუნიციპალიტეტის კომიტეტის თავმჯდომარემ, ჰელე ბართმა, აღნიშნა, რომ "ის დიდ ადგილს იკავებს და რთულია გარემოში მისი ჩატევა".

კოპენჰაგენი ცნობილია 1913 წელს ედვარდ ერიკსენის მიერ შექმნილი ბრინჯაოს "პატარა ქალთევზას" ქანდაკებით, რომელიც ჰანს კრისტიან ანდერსენის ზღაპარს ეფუძნება და ქალად ქცევის პროცესში მყოფ ქალთევზას გამოსახავს.

ედვარდ ერიკსენის პატარა ქალთევზა

ედვარდ ერიკსენის პატარა ქალთევზა