უკრაინის საგარეო საქმეთა სამინისტრო ქართული ოცნების წინასაარჩევნო კლიპს ეხმაურება, რომელშიც უკრაინაში ომის კადრებს, თბილისის ხედებს ადარებენ წარწერით — "არა ომს! — აირჩიე მშვიდობა!"

უკრაინის საგარეო უწყება ოცნების ამ ქმედებას ცინიკურად აფასებს, რომელიც უპატივცემულობას გამოხატავს უკრაინები ხალხის და რუსეთის აგრესიის მსხვერპლისადმი.

"უკრაინის საგარეო საქმეთა სამინისტრო კიდევ ერთ არამეგობრულ ნაბიჯზე ამახვილებს ყურადღებას, რომელიც მმართველმა პარტიამ "ქართული ოცნებამ" გადადგა — საკუთარი პოლიტიკური პიარისთვის აგრძელებს ვიდეოების გამოყენებას, სადაც ასახულია რუსეთის სრულმასშტაბიანი აგრესიის საშინელი შედეგები უკრაინის წინააღმდეგ.

ამგვარი ცინიკური ქმედებები გამოხატავს უპატივცემულობას უკრაინელი ხალხისა და რუსეთის აგრესიის მსხვერპლთა მიმართ და იწვევს უკრაინული საზოგადოების სამართლიან გაბრაზებას.

სასირცხვილოა იმის ყურება, თუ როგორ უცხადებს მორჩილებას საქართველოს ხელისუფლება მოსკოვს და უგულებელყოფს ღირსებისა და დამოუკიდებლობის იმ პრინციპებს, რომლებიც ისტორიულად თანდაჰყვა ქართველ ერს და მისი იდენტობის განუყოფელ ნაწილს წარმოადგენს.

ვურჩევთ მმართველი პარტიის პოლიტტექნოლოგებს, საკუთარ ხალხთან პატიოსნები იყვნენ და საკუთარ გვერდებზე უფრო სიმართლესთან ახლოს მყოფი სურათი განათავსონ: მარჯვნივ — რუსეთის სამფეროვანი, მარცხნივ — ევროკავშირის და ნატოს დახურული კარები. ეს იქნება ჭეშმარიტება, რადგან საქართველოს ამჟამინდელმა ხელისუფლებამ ქვეყანას არ ომი, არამედ ევროპული მომავალი წაართვა.

ამავდროულად, უკრაინა მტკიცედ და თანმიმდევრულად აგრძელებს მეგობარი ქართველი ხალხის მხარდაჭერას დამოუკიდებელი, დემოკრატიული და ევროპული სახელმწიფოს მშენებლობის მისწრაფებაში," — ვკითხულობთ განცხადებაში.

შეგახსენებთ, ქართულმა ოცნებამ აღნიშნულ ვიდეოში ვაკის პარკის შადრევნის კადრებიც გამოიყენა "მშვიდობის" საჩვენებლად — 2022 წელს ვაკის პარკში ბავშვებს ბურთი ამ შადრევანში ჩაუვარდათ, რომელშიც ჩასვლის შემდეგ სამივეს დენმა დაარტყა. ინციდენტს 13 წლის მარიტა მეფარიშვილის სიცოცხლე ემსხვერპლა.