პარტია თავისუფლების მოედნის წევრი დავით ჯინჭარაძე წერს, რომ ემიგრანტების დახმარებით ბრიტანეთის პარლამენტის წევრებს ღია წერილით მიმართეს და მიაწოდეს ინფორმაცია 60-ზე მეტ პოლიტპატიმარზე, რეპრესიებზე, ბაჩიაშვილის გატაცებაზე, ოპოზიციის ლიდერების დაჭერასა და მედიის თავისუფლების ხელყოფაზე. ისინი ბრიტანეთის ხელისუფლების გააქტიურებას, განსაკუთრებით სანქციების მიმართულებით, სამოქალაქო საზოგადოების გაზრდილ ფინანსურ მხარდაჭერას და პარლამენტში საქართველოს საკითხის წამოჭრას ითხოვენ.

"მიუხედავად იმისა, რომ ბრიტანეთის პარლამენტი სექტემბრამდე ისვენებს, წამოვიწყეთ კამპანია და ემიგრანტების დახმარებით მივმართეთ პარლამენტის წევრებს ღია წერილით. მივაწოდეთ ინფორმაცია 60-ზე მეტ პოლიტპატიმარზე, რეპრესიებზე, ბაჩიაშვილის გატაცებაზე, ოპოზიციის ლიდერების დაჭერასა და მედიის თავისუფლების ხელყოფაზე.

ვითხოვთ ბრიტანეთის ხელისუფლების გააქტიურებას, განსაკუთრებით სანქციების მიმართულებით, სამოქალაქო საზოგადოების გაზრდილ ფინანსურ მხარდაჭერას და პარლამენტში საქართველოს საკითხის წამოჭრას. ასევე, ვთავაზობთ ბრიტანეთს, სხვა ქვეყნებთან ერთად შეახსენონ ქართულ ოცნებას, რომ არსებული სიტუაციიდან მათთვის შედარებით უმტკივნეულო გამოსავალი ახალი საპარლამენტო არჩევნები იქნება, დასავლეთის გარანტიებით.

გთავაზობთ ჩვენს წერილზე გამოხმაურებას ბრიტანეთის პარლამენტის 5 დეპუტატის მხრიდან, მათ შორის 4 მმართველი ლეიბორისტული პარტიის წარმომადგენელია.

"ახლავე უნდა შეწყდეს საქართველოს ხელისუფლების მიერ პროტესტის მონაწილეებზე და ჟურნალისტებზე ძალადობა... მოვუწოდებთ საქართველოს ხელისუფლებას, გააუქმოს რეპრესიული კანონმდებლობა, გაათავისუფლოს პოლიტიკური პატიმრები და მონახოს გამოსავალი არსებული სიტუაციიდან," — ჯეიმს მიურეი, ლეიბორისტული პარტია.

"ვგმობ პოლიტიკურად მოტივირებული დაჭერების ტალღას და ოპოზიციის ლიდერების დაპატიმრებას. ზუსტად რეპრესიების ამ ტალღამ გამოიწვია ბრიტანეთის და საქართველოს შორის ურთიერთობების გაუარესება," - ბამბოს ჩარალამბოსი, ლეიბორისტული პარტია.

"ვიცი, რომ ბრიტანეთის ხელისუფლება პირდაპირ ესაუბრა ,,ქართული ოცნების’’ წარმომადგენლებს. საქართველოს დემოკრატიული უკუსვლა და პროტესტის მონაწილეების მიმართ ძალადობა ჩემთვის შემაშფოთებელია," — დერენ პაფი, ლეიბორისტი.

"კონსერვატიული პარტია აღარ ვართ ხელისუფლებაში, თუმცა ვაგრძელებთ საკითხზე დაკვირვებას. ჩვენ გავაგრძელებთ ბრიტანეთის ხელისუფლებისთვის საქართველოს საკითხზე შეკითხვების დასმას," - ოპოზიციის ლიდერის, კონსერვატორი კემი ბადენოკის ოფისი.

"ვგმობ ძალადობას ჟურნალისტების და პროტესტის მონაწილეების მიმართ… ბრიტანეთმა უკვე დააწესა სავიზო და სხვა სახის სანქციები დამნაშავეებისთვის, თუმცა ჯერ კიდევ ვაგრძელებთ მუშაობას საქართველოში თავისუფალი სამოქალაქო საზოგადოებისა და მედიის დასაცავად," — ტულიფ სიდიქი, ლეიბორისტული პარტია.

წერილი გადაეცა კიდევ რამდენიმე დეპუტატს, ლორდსა და საგარეო საქმეთა კომიტეტის თავმჯდომარეს. სანამ მმართველი პარტიის წევრები ერთმანეთზე ფიზიკურად ძალადობით არიან დაკავებულნი, ვაგრძელებთ ბრძოლას "ქართული ოცნების" იზოლაციისთვის ყველა დონეზე", — წერს დავით ჯინჭარაძე.