ამერიკის შეერთებული შტატების სახელმწიფო მდივანმა, ენტონი ბლინკენმა რუსეთის საგარეო საქმეთა მინისტრის, სერგეი ლავროვის მიწვევა მიიღო შესახვედრად, იმ პირობით, რომ რუსეთი უკრაინაში არ შეიჭრება. ამის შესახებ სახელმწიფო დეპარტამენტის პრესსპიკერმა, ნედ პრაისმა განაცხადა.

ბლინკენმა გაეროს უშიშროების საბჭოში გამოსვლისას თქვა, რომ რადგანაც სწამთ იმის, რომ კრიზისის მოგვარების ერთადერთი პასუხისმგებლიანი გზა დიპლომატია და დიალოგია, სერგეი ლავროვს შეხვედრას სთავაზობს ევროპაში მომავალ კვირას.

"რუსებმა გვიპასუხეს და შემოგვთავაზეს შეხვედრა მომავალი კვირის ბოლოს, რასაც ჩვენ ვთანხმდებით, პირობით, რომ რუსეთი უკრაინაში არ შეიჭრება. თუ ისინი შეიჭრებიან უახლოეს დღეებში, ეს ნათელს გახდის, რომ დიპლომატიას სერიოზულად არასდროს უდგებოდნენ", — დაწერა მოგვიანებით ტვიტერზე სახელმწიფო დეპარტამენტის პრესსპიკერმა, ნედ პრაისმა.

17 თებერვალს ოკუპანტებმა დონბასიდან ლუგანსკის ოლქის ერთ-ერთ დასახლებას ცეცხლი გაუხსნეს, ჭურვი კი საბავშვო ბაღს მოხვდა. ამას უკრაინის პრეზიდენტმა, ვოლოდიმირ ზელენსკიმ "დიდი პროვოკაცია" უწოდა და ხაზი გაუსვა უკრაინაში დიპლომატების დარჩენის აუცილებლობას.

რუსეთის მტკიცების პარალელურად, რომ უკრაინის საზღვრის სიახლოვიდან რუსული ჯარები გაჰყავთ, აშშ-ის პრეზიდენტის ადმინისტრაციის ოფიციალური წარმომადგენელი ამბობს, რომ ბოლო დღეებში უკრაინის საზღვართან რუსი სამხედროების რიცხვი 7 000-ით გაიზარდა. ზელენსკიც უარყოფს, რომ რუსეთის ჯარები გადიან. მისი თქმით, ამას რეალურად ვერ ხედავენ და მხოლოდ ესმით მის შესახებ.

ამერიკის შეერთებული შტატების სახელმწიფო მდივნის, ენტონი ბლინკენის განცხადებით, რუსულ სამხედრო ძალებს უკრაინის საზღვარი არ დაუტოვებიათ. მისი თქმით, რუსეთის ქმედებები და განცხადებები ერთმანეთისგან განსხვავდება.

პენტაგონის ინფორმაციით, ბოლო დღეების განმავლობაში, რუსეთის პრეზიდენტმა, ვლადიმერ პუტინმა უკრაინის საზღვართან და ბელარუსის ტერიტორიაზე დამატებითი სამხედრო ძალები განათავსა.

ევროპული საბჭოს პრეზიდენტის, შარლ მიშელის განცხადებით, რუსეთმა ომსა და დიპლომატიას შორის არჩევანი უნდა გააკეთოს. მისი თქმით, უკრაინის წინააღმდეგ რუსეთის უპრეცედენტო სამხედრო ესკალაცია ევროპაში მშვიდობასა და უსაფრთხოებას უქმნის საფრთხეს.