აშშ-ის პრეზიდენტის, ჯო ბაიდენის განცხადებით, რა ნაბიჯიც არ უნდა გადადგას რუსეთმა, იქნება ეს დიპლომატია თუ თავდასხმა, აშშ პარტნიორებთან და მოკავშირეებთან ერთად, მზად იქნება. მან ასევე აღნიშნა, რომ უკრაინაში რუსეთის შეჭრის საფრთხე ჯერ კიდევ არსებობს.

"რაც არ უნდა მოხდეს, აშშ მზადაა. ჩვენ მზად ვართ, რომ დიპლომატიით ჩავერთოთ რუსეთთან და ჩვენს პარტნიორებსა და მოკავშირეებთან ერთად გავაუმჯობესოთ სტაბილურობა და უსაფრთხოება მთლიანად ევროპაში. ასევე, ჩვენ მზად ვართ, რომ გადამწყვეტად ვუპასუხოთ, თუ რუსეთი უკრაინას თავს დაესხმება, რისი შესაძლებლობაც ჯერ კიდევაა. ბოლო რამდენიმე კვირის განმავლობაში, ეს იყო ჩვენი მიდგომა და ეს დარჩება ჩვენს მიდგომად ახლაც", — აღნიშნა მან.

მისივე თქმით, თავდასხმის შემთხვევაში მსოფლიო არ დაივიწყებს, რომ რუსეთმა სიკვდილი და დესტრუქცია აირჩია.

"თუ რუსეთი უკრაინას თავს დაესხმება, ამას საერთაშორისოდ დაგმობენ, მსოფლიო არ დაივიწყებს, რომ რუსეთმა არასაჭირო სიკვდილი და დესტრუქცია აირჩია. უკრაინაში შეჭრა იქნება თვითდამაზიანებელი ჭრილობა", — განაცხადა მან.

ბაიდენმა ასევე ისაუბრა რუსეთის განცხადებაზე, რომ უკრაინის საზღვრებიდან ჯარების გაყვანას აპირებს. მისი თქმით, გადაწყვეტილება ამ ეტაპზე დადასტურებული არ არის.

"რუსეთის თავდაცვის მინისტრმა დღეს განაცხადა, რომ მათი სამხედრო ნაწილები უკრაინის სიახლოვეს პოზიციებს ტოვებენ. ეს კარგი იქნება, თუმცა ეს ჩვენ ჯერ არ დაგვიდასტურებია. ჩვენ ჯერ არ დაგვიდასტურებია, რომ რუსეთის სამხედრო დანაყოფები მათ საშინაო პოზიციებზე ბრუნდებიან — ჩვენი ანალიტიკოსები მიუთითებენ, რომ ისინი საფრთხის შემცველ პოზიციებზე რჩებიან და ფაქტი ფაქტად რჩება, რომ ახლა რუსეთს უკრაინისა და ბელარუსის საზღვრების ირგვლივ 150 000-ზე მეტი სამხედრო ჰყავს და შეჭრა აშკარად კვლავ შესაძლებელია", — თქვა მან.

რუსეთის თავდაცვის სამინისტრო ამბობს, რომ უკრაინის საზღვართან მყოფი ჯარები წვრთნების დასრულების შემდეგ მუდმივი განლაგების პუნქტებს უბრუნდებიან. ამას გამოეხმაურა უკრაინის საგარეო საქმეთა მინისტრი, დმიტრო კულება და განაცხადა, რომ გადაწყვეტილებას დაიჯერებენ მაშინ, როდესაც ამას თავად დაინახავენ.

პენტაგონის ინფორმაციით, ბოლო დღეების განმავლობაში, რუსეთის პრეზიდენტმა, ვლადიმერ პუტინმა უკრაინის საზღვართან და ბელარუსის ტერიტორიაზე დამატებითი სამხედრო ძალები განათავსა.

14 თებერვალს უკრაინის პრეზიდენტმა, ვოლოდიმირ ზელენსკიმ მოსახლეობისთვის სპეციალური ვიდეომიმართვა გაავრცელა, რომელშიც მოსალოდნელ ომზე ისაუბრა. მისი განცხადებით, ეუბნებიან, რომ 16 თებერვალს დაიწყება სამხედრო ინტერვენცია, რასაც ისინი ერთობით უპასუხებენ. კერძოდ, ზელენსკიმ განაცხადა, რომ ამ დღეს უკრაინის დროშების და ცისფერ-ყვითელი ლენტების გამოფენით შეხვდებიან და მსოფლიოს მათ ერთიანობას აჩვენებენ.

11 თებერვალს ამერიკის შეერთებული შტატების სახელმწიფო მდივანმა, ენტონი ბლინკენმა განაცხადა, რომ რუსეთი უკრაინაში, შეიძლება, ნებისმიერ დროს შეიჭრას.

გაიგე მეტი: