რუსეთის ელჩი ევროკავშირში ვლადიმერ ჩიჟოვი აცხადებს, რომ მოსკოვი "კონტრშეტევას განახორციელებს", თუ მას აღმოსავლეთ უკრაინაში მცხოვრები რუსეთის მოქალაქეების დაცვა დასჭირდება.

"თუ უკრაინელები განახორციელებენ თავდასხმას რუსეთზე, არ გაგიკვირდეთ, თუ ჩვენ განვახორციელებთ კონტრშეტევას, ან თუ დაიწყებენ რუსეთის მოქალაქეების დახოცვას დონბასში ან სხვაგან", — განაცხადა მან The Guardian-თან ინტერვიუში.

უკრაინის პრეზიდენტმა, ვოლოდიმირ ზელენსკიმ 14 თებერვალს მოსახლეობისთვის სპეციალური ვიდეომიმართვა გაავრცელა, რომელშიც მოსალოდნელ ომზე ისაუბრა. მისი განცხადებით, ეუბნებიან, რომ 16 თებერვალს დაიწყება სამხედრო ინტერვენცია, რასაც ისინი ერთობით უპასუხებენ. კერძოდ, ზელენსკიმ განაცხადა, რომ ამ დღეს უკრაინის დროშების და ცისფერ-ყვითელი ლენტების გამოფენით შეხვდებიან და მსოფლიოს მათ ერთიანობას აჩვენებენ.

11 თებერვალს ამერიკის შეერთებული შტატების სახელმწიფო მდივანმა, ენტონი ბლინკენმა განაცხადა, რომ რუსეთი უკრაინაში, შეიძლება, ნებისმიერ დროს შეიჭრას. მოგვიანებით ეროვნული უსაფრთხოების საკითხებში აშშ-ის პრეზიდენტის მრჩეველმა, ჯეიკ სალივანმა კი მოუწოდა აშშ-ის მოქალაქეებს, დაუყოვნებლივ დატოვონ უკრაინა. ამერიკის მსგავსად სხვა ქვეყნებიც მოუწოდებენ საკუთარ მოქალაქეებს დატოვონ უკრაინა.