ქუთაისი ერთ-ერთ ცენტრალურ უბანში, ე.წ. "ზასტავაზე" მდებარე სკვერში, კიკვიძის ძეგლის ადგილას, ზვიად გამსახურდიას ძეგლი დაიდგმება. ამის შესახებ სოციალურ ქსელში ზვიად გამსახურდიას შვილი, ეროვნული ბიბლიოთეკის დირექტორი, კონსტანტინე გამსახურდია წერს.

"ქუთაისში ჩავედი, რათა მონაწილეობა მიმეღო მერიის კომისიის სხდომაში ზვიად გამსახურდიას ძეგლის დადგმასთან დაკავშირებით. იგი დაიდგმება იქ, სადაც იდგა კიკვიძის ძეგლი, ცხადია, ახალ კვარცხლბეკზე, რომელიც ოდნავ წინ იდგება. ზომაც სხვა ექნება. აქვე გარკვევით ითქვა, რომ კიკვიძის ძეგლი ყველა წესის დაცვით გადატანილი იქნება მუზეუმში, როგორც არტეფაქტი. ვიღაცების გასაგონად კიდევ ერთხელ: არავითარი ბუშის, გენშერის ან ჰავიერ სოლანას ძეგლის დადგმას აქ არავინ არ აპირებს და პროვოკაციულ განცხადებებს შეეშვან!", — წერს სოციალურ ქსელში კონსტანტინე გამსახურდია

წითელარმიელი ვასილ კიკვიძის ძეგლი ქუთაისში გასული საუკუნის 60-იანი წლებში დაიდგა. ის მოქანდაკე ვალერიან მიზანდარმა შექმნა. "რადიო თავისუფლებას" ცნობით, ეს ძეგლი დემონტაჟს გადაურჩა 90-იან წლებში, როცა ეროვნული მოძრაობის წარმომადგენლებმა ქალაქში ლენინის ძეგლი დაამსხვრიეს.