ხაშურის საკრებულოს თავმჯდომარის ყოფილი მოადგილე, ლევან გამრეკელი, რომელიც 5 მილიონი ლარის ღირებულების სახელმწიფო ქონების მითვისების ბრალდებით იყო დაკავებული, 10 000-ლარიანი გირაოს სანაცვლოდ გაათავისუფლეს — ინფორმაციას "ქართლის ამბები" ავრცელებს.

10 000-10 000-ლარიანი გირაო შეუფარდეს კიდევ ორ პირს, რომლებიც ლევან გამრეკელთან ერთად, ორგანიზებული ჯგუფის წევრობის ბრალდებით, იყვნენ დაკავებულები — პაატა ნოზაძესა და რომან მეტივიშვილს.

პროკურატურაზე დაყრდნობით, "ტვ პირველთი" ავრცელებს ინფორმაციას, რომ გამრეკელს აღმკვეთი ღონისძიების სახით პატიმრობა შეეცვალა გირაოთი, მიყენებული ზიანის სრულად ანაზღაურების სანაცვლოდ. ამ ეტაპისთვის ბრალდებულმა 2 მილიონი ლარის ზარალი დაფარა, ხოლო დარჩენილი სამი მილიონი ლარი დათქმულ ვადაში უნდა გადაიხადოს.

"ბრალდებულ ლევან გამრეკელს აღკვეთი ღონისძიება პატიმრობა შეეცვალა გირაოთი, მიყენებული ზიანის სრულად ანაზღაურების სანაცვლოდ. ბრალდებულმა ამ ეტაპზე უკვე დაფარა მიყენებული ზიანიდან 2 მილიონი ლარი, რაც შეეხება მიყენებული ზიანის თანხის ნაწილს, ბრალდებულს ასანაზღაურებლად მიეცა კონკრეტული დრო. ასევე, აღსანიშნავია, რომ ბრალდებულ ლევან გამრეკელის უძრავ-მოძრავი ქონება და ანგარიშები დაყადაღებულია. ბრალდებულ ლევან გამრეკელის სისხლის სამართლის საქმე არსებითი განხილვის ეტაპზეა," — განაცხადა უწყებამ.

გამრეკელი და მასთან დაკავშირებული ორი პირი 2025 წლის 11 ნოემბერს დააკავეს. ბრალდების მხარემ სასამართლოს აღკვეთის ღონისძიების შეცვლის მოთხოვნით მიმართა. სასამართლომ აღნიშნული შუამდგომლობა დააკმაყოფილა და ისინი გირაოს სანაცვლოდ გაათავისუფლა.

რა ედებოდა ბრალად ხაშურის საკრებულოს თავმჯდომარის ყოფილი მოადგილეს?

ლევან გამრეკელს, პაატა ნოზაძეს და რომან მეტივიშვილს ბრალი ორგანიზებული ჯგუფის მიერ ჩადენილი დიდი ოდენობით ქურდობის გამო წარედგინათ, რაც სასჯელის სახით 10 წლამდე თავისუფლების აღკვეთას ითვალისწინებს.

პროკურატურის განცხადებით, ლევან გამრეკელი, პაატა ნოზაძესთან და რომან მეტივიშვილთან ერთად, 2020-2023 წლებში ფარულად დაეუფლნენ შიდა ქართლის რეგიონის ტერიტორიაზე არსებულ 5 000 000 ლარის ღირებულების, სახელმწიფოს კუთვნილ მილსადენებს, რის შედეგადაც სახელმწიფოს დიდი ოდენობით მატერიალური ზიანი მიადგა.