2025 წლის სექტემბრიდან 2026 წლის აპრილამდე პერიოდში, 379-მა თანამდებობის პირმა 24 მილიონი ლარის ოდენობის საჩუქარი მიიღო — ინფორმაციას ორგანიზაცია "საერთაშორისო გამჭვირვალობა — საქართველო" ავრცელებს.

ამ მონაცემებიდან 11 მლნ ლარი ფულადი საჩუქარია, ხოლო უძრავი ქონება — 12 მლნ ლარი. მაღალჩინოსნებმა საჩუქრად მიიღეს ავტომობილები, იარაღი და სამკაული.

კორუფციისგან პრევენციისთვის, თანამდებობის პირები ვალდებულნი არიან, ქონებრივ დეკლარაციაში შეიტანონ მათი ან მათი ოჯახის წევრის მიერ მიღებული ნებისმიერი საჩუქარი, რომლის ღირებულება 500 ლარს აღემატება. ამასთან, მათ ეკრძალებათ ისეთი საჩუქრის მიღება, რომლის ღირებულება მათი წლიური ხელფასის 5%-ს აღემატება.

შეზღუდვები არ ვრცელდება თანამდებობის პირების მიერ ოჯახის წევრების ან ახლო ნათესავებისგან მიღებულ საჩუქრებზე.

ორგანიზაციის თქმით, "ეს გამონაკლისი ლოგიკურია, თუმცა, ამავე დროს, არსებობს საფრთხე, რომ სათანადო ზედამხედველობის არ არსებობის შემთხვევაში, გამონაკლისი კანონის "ხვრელად" გადაიქცეს, რომელსაც არაკეთილსინდისიერი მოხელეები კანონით აკრძალული შემოსავლის "გათეთრებისთვის" გამოიყენებენ, ანუ კანონის დარღვევით მიღებული შემოსავლის დეკლარირება მოხდება, როგორც ოჯახის წევრის ან ახლო ნათესავისგან მიღებული საჩუქრის.

თანამდებობის პირები საჩუქარს ყველაზე ხშირად უძრავი ქონების სახით იღებენ. 09.2025-04.2026 პერიოდში 100-მა პირმა ჯამურად 12 მლნ ლარზე მეტი ღირებულების უძრავი ქონება მიიღო. უძრავი ქონებიდან 48 საცხოვრებელი სახლია, ხოლო 69 — მიწის ნაკვეთი.

233-მა თანამდებობის პირმა ჯამურად 11 მლნ ლარი მიიღო ფულადი საჩუქრის სახით, რაც საშუალოდ ერთ პირზე 47 ათასი ლარია. მათგან 28 თანამდებობის პირს 100 ათას ლარზე მეტი ოდენობის თანხა აქვს მიღებული. საჩუქრებში დაადეკლარირეს ასევე 28 ავტომობილი და 6 იარაღი.

ფულადი საჩუქრის ჩუქების შემთხვევაში, საჩუქარი ხშირად დოლარში ან ევროშია მითითებული. 09.2025-04.2026 პერიოდში მიღებული 11 მლნ ლარის საჩუქრებიდან, 5,6 მლნ ლარი დოლარში იყო, ხოლო 1,7 მლნ ევროში.

მაღალჩინოსნებმა საჩუქრების 60.78% მშობლებისგან მიიღეს.

უწყებების მიხედვით, ჯამურად ყველაზე მეტი ღირებულების საჩუქარი მიიღო შინაგან საქმეთა სამინისტრომ — 2,3 მლნ ლარი.

პარლამენტის თავმჯდომარემ, შალვა პაპუაშვილმა TI-ის პუბლიკაციაზე კომენტირებისას თქვა, რომ "საერთაშორისო გამჭვირვალობა — საქართველო" გამიზნულად დეზინფორმაციას ავრცელებს, სახელმწიფოს სტრუქტურების და საჯარო მეხელეების წინააღმდეგ.

მან კვლევას "აბსოლუტური მანიპულაცია და ფარსი" უწოდა და ორგანიზაციას კიდევ ერთხელ უცხოური ძალისგან მართული უწოდა.

"ათობით ათასი საჯარო მოხელეა. ამისგან რაღაც დაჯამების გამოყვანა, რომ მეუღლემ მეუღლეს რაღაც აჩუქა ან შვილმა მშობელს რაღაც აჩუქა — ამის შეჯამება და შემდეგ წარმოდგენა რაღაც რიცხვებად, არის აბსოლუტური მანიპულაცია და ფარსი, რაც საერთოდ არაფერზე მეტყველებს. ეს ერთ რამეზე მეტყველებს მარტო — რომ "საერთაშორისო გამჭვირვალობა" არის საქართველოს წინააღმდეგ ჰიბრიდული ომის იარაღი." — განაცხადა პაპუაშვილმა.

შემდეგ ჟურნალისტმა პაპუაშვილს ყოფილი პრემიერმინისტრის, ირაკლი ღარიბაშვილის მაგალითი მოუყვანა და შეახსენა, რომ ისიც უკანონო შემოსავლებს "საჩუქრების" სახით ასახავდა დეკლარაციაში. პაპუაშვილის განმარტებით, არალეგალურ შემოსავალს დეკლარაციაში არ ასახავენ და "თავს არ ამხელენ".

"რა გათეთრებაზეა საუბარი, საუბრობენ დეკლარირებულ საჩუქრებზე, ხომ? თუკი არის რაიმე არალეგალური შემოსავალი, მაშინ მის დეკლარაციასაც არავინ არ მოახდენდა და რახან დეკლარაციაში არის, რაღაცნაირად იქნება ის არალეგალური შემოსავალი და საკუთარ თავს ხომ არ ამხელდა ადამიანი?" — ამბობს პაპუაშვილი.