აშშ-ის პრეზიდენტი დონალდ ტრამპი მხარს დაუჭერს რუსეთის წინააღმდეგ მიმართული ორპარტიული სანქციების პაკეტის მიღებას, რომლის მთავარი ინიციატორიც ახლახან გარდაცვლილი რესპუბლიკელი სენატორი ლინდსი გრემი იყო. ამის შესახებ ინფორმაციას CNN ავრცელებს.

CNN წერს, რომ ეს გადაწყვეტილება სენატორ გრემის მოულოდნელი გარდაცვალებიდან რამდენიმე დღეში გახდა ცნობილი, რაც, სავარაუდოდ, კიდევ უფრო გააადვილებს იმ კანონპროექტის მიღების პროცესს, რომლის ბოლომდე მისაყვანადაც სამხრეთ კაროლინელმა სენატორმა წლები იშრომა.

Axios-ის ცნობით, გრემის გარდაცვალების შემდეგ ტრამპმა ჟურნალისტებს უთხრა: "ამას განვიხილავთ. სერიოზულად ვფიქრობთ. ეს ლინდსის პატივსაცემადაც არის. მას ამაზე მეტად არაფერი უნდოდა". მან ასევე დაამატა, რომ "დიდი შანსია, ეს განხორციელდეს".

მანამდე ლინდსი გრემი და დემოკრატი სენატორი რიჩარდ ბლუმენტალი მიუთითებდნენ, რომ ადმინისტრაცია მზად იყო მხარი დაეჭირა ამ პაკეტისთვის და პარასკევს განაცხადეს კიდეც, რომ ხანგრძლივი მოლაპარაკებების შემდეგ შეთანხმებას მიაღწიეს. თუმცა, იმ დროისთვის მაინც გაურკვეველი რჩებოდა, დაუჭერდა თუ არა ტრამპი პირდაპირ მხარს კანონპროექტს, რადგან პრეზიდენტმა წარსულში არაერთხელ გააკრიტიკა ეს ინიციატივა და სანქციების დაწესებისას აღმასრულებელი ხელისუფლებისთვის მეტ პირად უფლებამოსილებას ითხოვდა.

რას ითვალისწინებს ახალი სანქციების პაკეტი?

უკრაინული მედიის ცნობით, ორწლიანი მოლაპარაკებებისა და თეთრ სახლთან კონსულტაციების შედეგად, კანონპროექტის პირვანდელი ვარიანტი მნიშვნელოვნად დაკორექტირდა და უფრო მიზანმიმართული გახდა. თუ თავდაპირველი ვერსია ითვალისწინებდა სატარიფო შეზღუდვების დაწესებას 60-ზე მეტი ქვეყნისთვის, მიმდინარე დოკუმენტი ფოკუსირებულია:

  • მსხვილ იმპორტიორებზე: სანქციები და ტარიფები შეეხება რუსული ნავთობის 5 უმსხვილეს და რუსული ბუნებრივი აირის 5 უმსხვილეს იმპორტიორ ქვეყანას (რომელთაგან ნაწილი იკვეთება).

  • მკაცრ გამონაკლისებზე: მნიშვნელოვნად ვიწროვდება სანქციებიდან გამონაკლისების დაშვების შესაძლებლობები.

  • სავაჭრო წარმომადგენლის უფლებამოსილებაზე: იზრდება აშშ-ის სავაჭრო წარმომადგენლის (USTR) როლი კონკრეტული სატარიფო განაკვეთების განსაზღვრის პროცესში.

  • რუსულ "ჩრდილოვან ფლოტზე": კანონპროექტში პირველად ჩაიწერა ცალკეული, სპეციალური თავი, რომელიც მიზნად ისახავს რუსეთის ე.წ. "ჩრდილოვანი ფლოტის" (ტანკერების ქსელის, რომლითაც მოსკოვი გვერდს უვლის საერთაშორისო სანქციებს) ბლოკირებას. სენატორ ბლუმენტალის განცხადებით, შემუშავებულია ეფექტური იარაღი ამ ფლოტის ოპერაციების შესაჩერებლად, რაც მოსკოვს ენერგორესურსების ექსპორტიდან მიღებულ შემოსავლებს საგრძნობლად შეუმცირებს.

შგახსენებთ, ამერიკელი სენატორი ლინდსი გრემი 11 ივლისს მოულოდნელად გარდაიცვალა. აშშ-ის კოლუმბიის ოლქის (ვაშინგტონის) სამედიცინო ექსპერტის წინასწარი შემოწმების თანახმად, მისი მოულოდნელი გარდაცვალება გულის პრობლემამ გამოიწვია.