"ოცნების" დეპუტატი ლევან მაჭავარიანი ევროკავშირის უმაღლესი წარმომადგენლის, კაია კალასის განცხადებას გამოეხმაურა იმის შესახებ, რომ ევროკავშირი შავი ზღვის სტრატეგიის განხორციელებას განაგრძობს, მაგრამ ამ პროცესში საქართველო არაა ჩართული რადგან, "გარკვეული სირთულეები აქვთ საქართველოსთან დაკავშირებით, რადგან არ აქვთ კავშირი მთავრობასთან". მან ისიც დაამატა, რომ მათ საქართველოს ხელისუფლებასთან კავშირი არ სურთ, უნდათ მხოლოდ ქართველი ხალხის მხარდაჭერა.

"სახლობანას თამაშს აგრძელებს ქალბატონი კალასი და არ ვიცი, სადამდე უნდა გაგრძელდეს ეს ყველაფერი, ქალბატონი, რომელიც, ფაქტობრივად, ორი წელია ეხვეწება ბატონ მარკო რუბიოს შეხვედრაზე და შეხვედრა ვერ ჩანიშნა. იმდენად არასერიოზულად განიხილავენ გლობალური აქტორები და მოთამაშეები ქალბატონ კალასს და იგი აგრძელებს ამ არასერიოზულ დამოკიდებულებას. ჩვენ ვაკავშირებთ შვიდ ქვეყანას შავ ზღვასთან და შავი ზღვის გარშემო მიდის საუბარი და საქართველოს საერთოდ არ ახსენებს, გააგრძელონ ასეთ გაბუტულ რეჟიმში მუშაობა და მოღვაწეობა და ვინ დარჩება მოგებული, მაგასაც ვნახავთ", — განაცხადა მაჭავარიანმა "პირველი არხის" ჟურნალისტთან საუბრისას.

ევროკავშირის უმაღლესმა წარმომადგენლმა, კაია კალასმა ეს კომენტარი 13 ივლისს "ევროსკოპთან" გააკეთა:

"შავი ზღვის სტრატეგია, რომელიც ჯერ კიდევ გასული წლიდან გვაქვს შემუშავებული, ახლა უკვე განხორციელების ფაზაშია. შავი ზღვის გარშემო მდებარე სხვადასხვა ქვეყნები, რა თქმა უნდა, ამის მნიშვნელოვანი ნაწილები არიან. ახლა ჩვენ ასევე გარკვეული სირთულეები გვაქვს საქართველოსთან დაკავშირებით, რადგან რეალურად არ გვაქვს კავშირი მთავრობასთან და ჩვენ არ გვსურს მთავრობის მხარდაჭერა, ჩვენ გვინდა მხარი დავუჭიროთ ქართველ ხალხს. ჩვენ ასევე გვქონდა დისკუსიები იმის შესახებ, თუ როგორ შეგვიძლია ეს საუკეთესოდ გავაკეთოთ, რომ ხალხმა იმედი არ დაკარგოს", — განაცხადა კაია კალასმა "ევროსკოპთან" საუბრისას.