პარლამენტის ვიცესპიკერი ნინო წილოსანი "ერთიანი ნეიტრალური საქართველოს" წევრების ჩვენებებზე კომენტირებისას, "ტვ პირველის" ჟურნალისტთან აცხადებს, რომ "ის ყველაფერი, რაც 2024 წელს ხდებოდა, არ იხარშებოდა საქართველოში, მას ჰქონდა ძალიან დიდი მხარდაჭერა "დიფ სთეითის" და არაფორმალური გავლენებისგან".

"ეს არ არის პოლიტიკური ველი, ეს არის დამნაშავეების ველი, რომლებსაც აქვთ კონკრეტული დანაშაულები ჩადენილი, რომლისთვისაც ისინი გადიან სასამართლო პროცესებს, რიგი მათგანი უკვე ბრალდებულია და შესაბამის პასუხისმგებლობაშია მიცემული.

მაგალითად, გუშინ კაია კალასის განცხადება, რომელიც, მიუხედავად იმისა, რომ ის ევროკავშირის ოფიციალურ სტრუქტურას წარმოადგენს და ის ნამდვილად არ ეკუთვნის საკუთარ თავს, პირდაპირ, ურცხვად და ყველანაირი პროტოკოლის დარღვევით ამბობს, რომ ის არ ითანამშრომლებს ქართველი ხალხის ოფიციალურად არჩეულ ხელისუფლებასთან. ეს არის იმ თავისი ძირითადი მისიის პირდაპირი უგულებელყოფა, რომელიც წესით ევროკომისარმა და ევრობიუროკრატიის წარმომადგენელმა უნდა ატაროს. ამიტომ, როდესაც ასეთ განცხადებებს უკვე პირდაპირ აკეთებენ, რა თქმა უნდა, არ გვიკვირს, რომ მათ მხრიდან, როგორც პირდაპირ, ასევე არაფორმალურად და არაოფიციალურად ხდებოდა იმ რადიკალიზმის მხარდაჭერა და წახალისება, რომელსაც ჩვენ წლების მანძილზე საქართველოში ვუყურებთ. ფაქტია, რომ ის ყველაფერი, რაც 2024 წელს ხდებოდა, არ იხარშებოდა საქართველოში, მას ჰქონდა ძალიან დიდი მხარდაჭერა deep state-ის და არაფორმალური გავლენებისგან", — თქვა წილოსანმა.

თბილისის საქალაქო სასამართლოში ე.წ საბოტაჟის საქმეზე პარტია "ნეიტრალური საქართველოს" წევრები დაიკითხნენ. ადვოკატ ომარ ფურცელაძის განცხადებით, პარტიის ლიდერებმა დაკითხვაზე განაცხადეს, რომ სისხლის სამართლის დანაშაულში "აგენტურული ჯგუფის მხარდამჭერები და თანამოაზრეები არიან: არიან კაია კალასი, ურსულა ფონ დერ ლაიენი, მარტა კოსი, კელი დეგნანი და CIA.