სამართალდამცავებმა ნარკოდანაშაულის ბრალდებით, 121 პირი დააკავეს, აქედან 59 ნარკორეალიზაციის სქემაში სხვადასხვა ფორმით იყო ჩართული.

შინაგან საქმეთა სამინისტროს განცხადებით, დაკავებულებს შორის არიან როგორც საქართველოს, ასევე უცხო ქვეყნის მოქალაქეები. ჩხრეკის შედეგად ამოღებულია დიდი ოდენობით ნარკოტიკული საშუალება — მეტადონი, ალფა-PVP, კოკაინი, კეტამინი, ბუპრენორფინი, მარიხუანა, მცენარეული კანაფი და სხვა.

გამოძიება საქართველოს სისხლის სამართლის კოდექსის 260-ე, 260-ე ტერცია, 260-ე კვარტა, 261-ე და 265-ე პრიმა მუხლებით მიმდინარეობს, რაც 20 წლამდე ან უვადო თავისუფლების აღკვეთას ითვალისწინებს.

ცენტრალური კრიმინალური პოლიციის დეპარტამენტის დირექტორმა, დავით კიკნაძემ, ბრიფინგზე ასევე განაცხადა, რომ მიმდინარე წლის 6 თვის მონაცემებით, ნარკოდანაშაულის ბრალდებით 5000-მდე პირი მიეცა პასუხისგებაში — მათ შორის, 1000-მდე პირი ნარკორეალიზაციაში სხვადასხვა ფორმით იყო ჩართული.

უწყების ინფორმაციით, წინა წელთან შედარებით, ნარკოდანაშაულის ბრალდებით პასუხისგებაში მიცემული პირების რაოდენობა 85%-ით არის გაზრდილი.