თეთრი სახლის განცხადებით, აშშ-ის პრეზიდენტმა ჯო ბაიდენმა, უკრაინის პრეზიდენტს, ვოლოდიმირ ზელენსკის სატელეფონო საუბრისას უთხრა, რომ თუ რუსეთი კვლავ შეიჭრება უკრაინაში, აშშ და პარტნიორები მას მტკიცე პასუხს გასცემენ. მათივე ცნობით, ჯო ბაიდენმა ასევე მხარდაჭერა გამოხატა დიპლომატიური მოლაპარაკებების მიმართ, რომელიც მომავალ კვირას იწყება.

"პრეზიდენტმა ბაიდენმა აღნიშნა, რომ აშშ, მოკავშირეები და პარტნიორები მტკიცე პასუხს გასცემენ რუსეთს, თუ რუსეთი უკრაინაში კვლავ შეიჭრება. ლიდერებმა გამოთქვეს მხარდაჭერა დიპლომატიური ძალისხმევის მიმართ, რომელიც მომდევნო კვირიდან იწყება.

პრეზიდენტმა ბაიდენმა ხაზი გაუსვა შეერთებული შტატების, მოკავშირეებისა და პარტნიორების ერთგულებას პრინციპის მიმართ — "არაფერი შენ გარეშე". მან კიდევ ერთხელ დაადასტურა შეერთებული შტატების ერთგულება უკრაინის სუვერენიტეტისა და ტერიტორიული მთლიანობის მიმართ", — ვკითხულობთ განცხადებაში.

ვოლოდიმირ ზელენსკიმ სატელეფონო საუბრის შემდეგ დაწერა, რომ აშშ-ის პრეზიდენტთან ევროპაში მშვიდობის შენარჩუნების, შემდგომი ესკალაციის თავიდან აცილების, რეფორმების და დეოლიგარქიზაციის მიმართულებით უკრაინის, შეერთებული შტატებისა და პარტნიორების ერთობლივი ქმედებები განიხილა.