სენატორებმა ჯინ შაჰინმა, ჯიმ რიშმა, რონ ჯონსონმა და ბინ კარდინმა ექსპრეზიდენტ მიხეილ საკაშვილზე წერილი გაავრცელეს და აცხადებენ, რომ ყურადღებით ადევნებენ მიმდინარე მოვლენებს, რომლებიც აშშ-ის სენატში საქართველოს მეგობრებს აწუხებთ.

ისინი ხაზს უსვამენ სააკაშვილის საქმეზე სამართლიანი, გამჭვირვალე სასამართლო პროცესის აუცილებლობას და სხდომაზე სააკაშვილის დასწრების მნიშვნელობაას. სენატორები აღნიშნავენ, რომ სამართლიანი და სწრაფი სასამართლოს უფლება ნებისმიერი დემოკრატიის დამახასიათებელი ნიშანია და ეს საქმე გამონაკლისი არ არის.

"ბატონი სააკაშვილი, ისევე როგორც ყველა პატიმარი, რომელიც სასამართლოს ელოდება, იმსახურებს სამართლიანად და ღირსეულად მოპყრობას საერთაშორისო სტანდარტებისა და ქართული კანონმდებლობის შესაბამისად. ჩვენ შეშფოთებული ვართ იმით, რომ ამჟამად ასე არ არის", — ვკითხულობთ განცხადებაში.

სენატორები ასევე აღნიშნავენ, რომ მდგომარეობა დღითიდღე უფრო მძიმდება და არსებობს არასწორი გათვლის რისკი, რამაც შეიძლება საკაშვილის მძიმე დაზიანება გამოიწვიოს. მათი თქმით, ასეთი ტრაგედია უარყოფით გავლენას მოახდენს ქვეყნის დემოკრატიულ მისწრაფებებზე, ამიტომ მოუწოდებენ ყველა მხარეს, იმოქმედონ ქართველი ხალხის ინტერესებიდან გამომდინარე.

გარდა ამისა, სენატორები მოუწოდებენ საქართველოს მთავრობას, სააკაშვილის სიტუაციის სერიოზულობა აქციონ პრიორიტეტად და გაითვალისწინონ ამ პროცესების გავლენა ქვეყნის პოლიტიკურ სტაბილურობაზე. მათი განცხადებით, ახლა დროა გვერდით გადაიდოს პოლიტიკური განსხვავებები ქართველი ხალხის საკეთილდღეოდ.

სენატორები ასევე მოუწოდებენ მთავრობას, რომ სააკაშვილის მკურნალობისას უზრუნველყონ დამოუკიდებელი სამედიცინო გუნდის რეკომენდაციების გათვალისწინება. განცხადება სავარაუდოდ იქამდეა დაწერილი, სანამ ცნობილი გახდებოდა, რომ სააკაშვილი გორის სამხედრო ჰოსპიტალში გადაიყვანეს, რადგან სენატორმა შაჰინმა ის გადატვიტა და დაწერა, რომ მიესალმება ინფორმაციას სააკაშვილის გადაყვანისა და შიმშილობის შეწყვეტის შესახებ.

გუშინ, 19 ნოემბერს კი იუსტიციის სამინისტრომ მიხეილ სააკაშვილს გორის სამხედრო ჰოსპიტალში გადაყვანა შესთავაზა, რასაც ექსპრეზიდენტი დათანხმდა და განაცხადა, რომ განთავსებისთანავე შიმშილობას შეწყვეტს.

სააკაშვილი 50 დღე შიმშილობდა. ადვოკატები, სამედიცინო სფეროს წარმომადგენლები, ომბუდსმენი, მხარდამჭერები, საერთაშორისო პარტნიორები მოუწოდებდნენ მთავრობას, ექსპრეზიდენტი სამოქალაქო კლინიკაში გადაეყვანა, თუმცა ამის ნაცვლად ის ძალის გამოყენებით გლდანის ციხის სამკურნალო დაწესებულებაში გადაიყვანეს. ამის გამო, პროტესტის ნიშნად, სააკაშვილმა სამედიცინო მომსახურებაზე უარი თქვა და მისი მდგომარეობა დამძიმდა, რის შემდეგაც მოწოდებები გადაყვანაზე გახშირდა, თუმცა ხელისუფლება უარზე იყო.

სტრასბურგის სასამართლოს გადაწყვეტილების შემდეგ, რომელმაც სააკაშვილს შიმშილობის შეწყვეტისკენ მოუწოდა, ხოლო სახელმწიფოს მის ჯანმრთელობაზე ინფორმაციის მიწოდებისა და შიმშილობის მერე ადეკვატური მკურნალობა დაავალა, ექსპრეზიდენტმა განაცხადა, რომ შიმშილობას შეწყვეტს, თუ სამოქალაქო კლინიკაში გადაიყვანენ. პასუხად იუსტიციის მინისტრმა თქვა, რომ მოხარული იქნებიან თუ არ იშიმშილებს, მაგრამ დათქმების გარეშე